“Prevent Now 2015” di Ennia lo enfoca riba siguridad den trafico

ORANJESTAD- Den nan afan pa duna bek na comunidad, ENNIA a constata cu tanto negoshinan como personanan individual tin necesidad di ricibi mas informacion tocante siguridad, specificamente riba comportacion den trafico. Dia 14 di october proximo, Ennia ta presenta su seminario anual “Prevent Now” den Renaissance Convention Center. E seminario ta gratis y tur esunnan interesa por registra pa medio di ennia.com. E seminario e aña aki ta dedica na e tema “road safety” y ta enfoca riba informacion clave pa prevencion di accidente di trafico y medidanan preventivo.

PUNTO DI SALIDA

Ehecutivonan di ENNIA tin como punto di salida cu placa no ta tur cos den caso di bon cobertura pa medio di seguro, pasobra placa cu e seguro ta paga bo nunca por cubri e perdida di sernan keri, cu tin masha hopi balor sentimental y cu hamas por wordo reemplaza.

CIFRA DI ACCIDENTE DI TRAFICO ALARMANTE

Teniendo na cuenta cu cifra di accidentenan di trafico ta alarmante, e Managing Board di ENNIA Caribe Holding N.V. a scoge diferente orado cu poder informativo pa trece datonan y splicacion durante e seminario. Tambe a invita Minister di Husticia mr. Drs. Arthur Dowers pa hiba palabra durante e evento. “ENNIA, more than insurance”, ta trece un serie di presentacion di expertonan riba e tereno di trafico.

TOPICO NOS TRAFICO

Mayor di Polis, Alex Pieters, ta un miembro di Cuerpo Policial for di aña 1997 y ta specialisa den trafico. Tambe e ta trahando un biaha pa siman como consultant pa Cuerpo Policial cu e departamento di Curriculum Ontwikkeling di Departamento di Enseñansa pa desaroyo di materialnan pa les di verkeer na scol lo trece e interesante topico “Nos trafico Aruba, e caminda pa siguridad”.

INFORMACION TOCANTE MORTALIDAD

Durante e seminario, Departamento di Salubridad Publico (DESPA) lo presenta informacion tocante mortalidad y morbilidad como consecuencia di accidentenan di trafico, treci dilanti pa Maribelle Tromp, Hefe di e departamento di epidemiologia, y ta encarga cu diferente investigacion y sondeo, como tambe e parti di conseho pa Minister di Salud encuanto di “kaderbeleid”.

FIRE PREVENTION WEEK

Mr. Sergio Wever, Be Safe 4 Life Consultancy, lo elabora riba Fire prevention in Traffic cu e tema “ Stay Calm and act quickly”. E director di operacion di ForenSys Aruba, Jessy Wiersma, tambe lo ta un di e oradonan na e seminario anual Prevent Now! Y lo enfatisa riba e colaboracion y registracion di Forensys Aruba. ENNIA ta contento di por presenta tambe durante e seminario Prevent Now oradonan di Hulanda, Mr. Eric de Bree, “Slim op Weg” y for di Corsou Mr. Gilbert Martina, Senior Managing Director cu lo focus riba e topico “Preventie Winkel”.

INSCRIPCION

No ta importa con bon bo ta sigura, “One ounce of prevention is worth a pound of cure”, cu ta nifica “un ons di prevencion ta bal un liber di cura” o sea “Preveni ta miho cu lamenta”. Probecha di e oportunidad aki y inscribi awe mes pa e seminario gratis di ENNIA via di www.ennia.com.