Film cu bailarina di Aruba Wilma Kuiperi a gana premio na Europa

ORANJESTAD - E cine titula “HOME” di e cineasta Hulandes di Amsterdam Leo van Emden, den cual e conocido bailarina profesional y maestra di baile di Aruba Wilma Kuiperi-Jansen ta actua, a gana e “Joie de Vivre Bronze Award 2015”. E award aki ta un di e premionan di e Dance Movie Competition di e organisacion Pavillion Dance South West a Bournemouth, Inglatera. E Dance Movie Competition ta parti di e National Dance Development Program na Inglatera, y e aña aki a registra 21 film for di 6 diferente pais pa competi pa e premionan.

HONOR GRANDI

Pues ta un honor grandi pa Wilma Kuiperi-Jansen, pa pais Aruba y pa e cineasta Leo van Emden cu e film ”Home” a gana e premio aki entre tur e participantenan internacional. Miembronan di e hurado tabata Bob Lockyer, Diane Amans, Fergus Early y Zanna Doan (Presidente di PDSW), cada un ex-bailarin, coreografo y producernan conosi na Europa. Segun e informacion ricibi for di Inglatera, e hurado a keda impresiona pa e coreografia y movementonan den e film.

HOME

“HOME” ta un pelicula cortico blanco y preto, cu ta mustra e bailarina Wilma Kuiperi-Jansen interpretando su propio coreografia den e naturalesa na e costa p'ariba di Aruba. E concepto ta simpel y ta enfoca riba e bailarina den e ambiente natural di Aruba. Pero pa e motibo aki mes e ta crea un tension y un esfera hopi unico. E interpretacion, filmacion y editing di van Emden tambe ta contribui na hasi di “HOME” un obra di arte cinematografico cu ya caba a hasi un impacto durante su estreno na Inglatera.

LEO VAN EMDEN

Leo van Emden tin varios produccion internacional riba su number, y Wilma Kuiperi-Jansen ta un profesional Arubano den baile cu un carera internacional hopi extenso, incluyendo presentacionnan na Merca y Europa. Su talento unico den baile a haña hopi aprecio y reconosemento den exterior den añanan ’80, resultando den varios contrato cu companianan profesional y presentacionnan riba esenarionan na Sur y Norte America, henter Europa, North Africa y Medio Oriente. A base di esaki Wilma Kuiperi-Jansen a crea e famoso Aruba Internacional Dance Festival cu e top mundial di baile na Aruba durante un decada completo. Un aspecto unico di e organisacion PDSW ta cu nan a enfoca e competencia di 2015 riba bailarinnan riba edad di 50 aña cu experiencia y un carera importante y cu ainda ta activo bailando. Esaki ta algo sumamente unico y ta mustra aprecio pa artistanan cu experiencia y cu por mustra un calidad maximo di nan madures artistico y personal, pues por bisa un asercamento hopi sostenibel di e capital humano y artistico di un pais. Cu e award aki, pa e produccion “HOME” cu ta mustra Aruba y cu ta menciona Aruba den su credits, a sali publica net na cuminsamento di e Aruba Intl. Film Festival 2015, ta duna un impulso extra na e festival y ta forma un inspiracion pa e arte di cinematografia na Aruba.