Simar: Cada aña e retonan pa e maestro ta mas grandi

ORANJESTAD - “Fortalece maestronan, construyendo sociedadnan sostenibel”, slogan di Unesco pa 2015. Kico tur esaki kiermen pa nos pais Aruba y enseñansa? Aki ta pone enfasis con importante e trabou di un maestro ta y cuanto balor e tin pa un pais. Maestronan no solamente ta e base pa logra metanan di educacion pero tambe e maestro ta e yabi pa yuda crea un sociedad cu capacidad y calidad cu ta eleva e pais den su norma, balornan y conocemento. Maestronan ta forma e futuro profesionalnan cu ta guia e futuro generacionnan y nos pais. Lastimamente ainda nos maestronan tin retonan grandi ta enfrenta tur dia. Entre otro calidad di enseñansa inferior, diferencianan grandi di cada directiva di scol pa un pais asina chikito, falta di material adecua y actual, falta di training y formacion di e maestro, falta di mas maestro y hopi importante: un status poco eleva den comunidad. Maestronan tin añanan ta warda pa un restructuracion salarial cu no tin fin di keda cla pa por ser implementa. Nos enseñansa ta basa ainda riba leynan hopi anticua den un mundo practicamente moderno. Maestronan ta enfrentando retonan grandi caminda educacion a tuma over enseñansa, esta un sistema educacional cu tin e responsabilidad di brinda enseñansa, pero acerca tin e tarea di educa alumnonan. E peso di trabou pa un maestro dia pa dia ta birando hopi mas. Pa un maestro por funciona optimalmente e ta dedica mas di 10 ora sigur pa dia dedicando su mes na entre otro duna les, atende e alumno, atende reunion, traha riba relatonan, prepara les pa e dia siguiente, atende workshop y curso, haci bishita na cas y analisa testnan. Esakinan ta djis un parti chikito di su trabou cu ta nifica hopi si. Y ainda mas e maestro tin cu motiva su mes y motiva su muchanan den un clas sin airco, cu poco ventilacion, den un ambiente of infrastructura no sigur, cu poco material, sin fondo suficiente pa si kier haci un diferencia y hopi biaha ora e cana su caminda e ta haña murayanan halto cu ta practicamente imposibel pa surpasa. Un maestro apart di ta un educador tin cu eherce e function di dokter of verpleegster, di polis, di psicologo, di trahado social, di referee, di dentista, di mama y hopi biaha ta victima den un sistema inhusto. Unda e maestro mes por bay pa su derechonan, pa su stabilidad emocional, pa sinti su mes sigur y motiva pa sigui eherce su trabou optimal?

Educacion ta hunga un rol importante den desaroyo humano, social y economico di un pais. P'esey gobierno mester inverti mas sin pensa dos biaha den enseñansa y den nos maestronan. Si nos kier traha na un sociedad sostenible y eleva calidad di nos pais Aruba, nos mester eleva e status di TA Maestro, mehora condicionnan di nan trabou, drecha nan posicion huridico y nan salario y sigui inverti den nan formacion.  

Sindicato di Maestro di Aruba kier a felicita tur maestro awe riba e dia special aki. Gradici cada maestro pa e bon trabou di cada dia. Pa e diferencia cu cada uno ta haci cerca un alumno, un studiante of un colega. Sigui motiva pa eherce e trabou bunita aki cu e mesun amor, dedicacion y pasion di semper.