Situacion di sluis habri na Bubali Plas tin hopi hende preocupa

ORANJESTAD – E situacion cu a surgi diabierna siman pasa na Bubali Plas a haya basta atencion den fin di siman. Despues cu a tuma nota cu e sluis na e plas a wordo habri, a nota cu esey a pone cu e awa a cuminsa sali, y cune, e piscanan den e plas. E vespertino Amigoe den fin di siman a publica un articulo extenso riba e tema aki. Eynan nan a combersa cu Rudy Davelaar di Aruba Marine Park Foundation, cu segun e vespertino, tabata den shock. “E sluis pa lama ta hancho habri. Bubali Plas ta kedando sin awa”, e comentario tabata. NoticiaCla.com a compronde cu ora cu a notifica autoridad manera polis, cu e interes no tabata grandi. No por a confirma e ultimo aki si.

RECONOCI PERO NO PROTEHI

E plas di Bubali ta un sanctuary pa parha, y ta un di e 4 areanan di parha (IBA’s) internacional reconoci segun Greg Peterson, presidente di Aruba Birdlife Conservation. Problema segun Peterson, ta cu mientras cu nan ta reconoci, nan no ta protehi. “Ningun di nan. Si. Niun!” Peterson ta comenta riba su pagina di Facebook. Ademas e ta mustra cu mayoria di nan ta ‘mal maneha structuralmente’ y esun mas pio maneha segun e, ta esun di Bubali Plas. E area ey ta mucho mas grandi cu hendenan ta na altura di dje. E no ta solamente e area dilanti di The Mill Resort, sino e ta extende mucho mas leu cu esey. Fotonan cortesia Greg Peterson