Rutte no tabata na altura di carta di premiernan di Caribe

ORANJESTAD — Premier hulandes Mark Rutte durante e reunionnan di Nacionnan Uni na New York recientemente no tabata na altura di e carta cu e premiernan di Aruba, Corsou y St Maarten a traha pe. Por lo menos asina premier Mike Eman a declara na partner di NoticiaCla.com, esta Caribisch Netwerk. Den e carta (cu NoticiaCla.com a publica den forma di exclusividad), e premiernan ta pone cu den futuro nan lo no coopera, si Hulanda bolbe interveni pa medio di gobernador, den nan asuntonan interno.

PALABRACION

Eman tabata hunto cu premiernan Ben Whiteman di Corsou, y Marcel Gumbs, e momento ey ainda premier di St Maarten, na New York pa yuda lobby pa un asiento no permanente pa Reino hulandes den conseho di seguridad di Nacionan Uni. Segun Eman, e premiernan a palabra di antemano cu nan lo trata e asunto aki. For di e combersacionnan ey, a produci un carta cu tur tres oficina di e ministernan a wordo concipia.

CARTA FIRMA

E carta a wordo firma y manda pa e oficina di premier Rutte na Binnenhof na Den Haag. Segun Eman, no tabatin ningun tension cu Rutte despues di e carta. “Awe ainda mi a papia cune na telefon” Eman a sigura CN.

E CARTA

Den e carta na Rutte, Eman, Whiteman y Gumbs ta mustra Rutte no solamente riba e conseho di Raad van State, sino tambe riba e posicion di e comision di decolonisacion di Nacionan Uni ora cu e statuut di Reino a keda instala y presenta na dicho comision. E tres premiernan ta sigura cu e comision e tempo ey tabatin duda cu e seriedad di Hulanda pa tene su mes dentro di e regla nobo dentro di Reino. Tabata finalmente e representantenan di Antias e tempo ey cu a trankilisa e comision di decolonisacion. E palabracion haci e tempo ey, tabata cu Antias semper por a bati na porta di NU, si nan sinti cu Hulanda tabata surpasa nan tarea dentro di Reino.

Autor Ariën Rasmijn Caribisch Netwerk