Controladornan aereo por usa dos idioma pa comunica te cu juni 2016

ORANJESTAD – Controladornan aereo por usa dos idioma pa comunica cu pilotonan, te otro aña juni 2016. Ta considera esaki un fase transitorio extendi, pa despues implementa e regla di uso di un solo idioma, cu ta ingles. Esey a keda convini entre minister di transporte Otmar Oduber y e controladornan aereo durante un reunion entre nan diadomingo mainta. Esey a evita un caso sumario diadomingo mes pa evita mas problema laboral, y a resolve un problema cu tabatin cu e controladornan aereo y crea un tipo di paz bek pa e trahadornan di toren.

SITUACION DI AO

Desde diabierna a sinti cu tabatin un tipo di accion caminda empleadonan a meld ziek unda cu nan a bay dokter y a keda comproba cu nan ta sufri di un of otro malesa. A base di esaki a constata cu por tin consecuencia pa fin di siman, unda lo por tabatin problemanan grandi. A base di esaki, practicamente tur gremio comercial a uni cabez pa evita cu lo tin un tipo di continuacion di accion cu por perhudica interes general di Pais Aruba. Mayoria di e gremionan aki a uni na ANSA cu lo a entama un kort geding. Pero diadomingo durante e reunion cu controladornan aereo, Minister Oduber por a notificanan cu esaki no lo ta necesario mas mirando cu a yega un acuerdo.

RADAR DETACHERING

segun acuerdo di ANSA cu Centro di Control na Corsow, lo bay bin un radar detachering cu ta duna e posibilidad pa visualmente, na caminda pa nos propio surveillance system, toren di Aruba por traha miho riba aspecto di seguridad. Mientras tanto lo notifica ICAO cu temporalmente lo por bay usa Spaño como lenguahe secundario, no manera cu e tabata antes como ‘dual language’. Ingles lo wordo usa como idioma principal y Spaño como idioma secundario, esaki te cu juni otro aña bou di e condicion di otro reglanan cu mester cumpli tambe, esta cu mester ta certifica den Spaño, algo cu no a tuma lugar te na e momentonan aki. E certificacion aki mester tuma lugar entre awo pa december pa cumpli cu e reglanan internacional.

CONTROLADORNAN AEREO

Vocero di e Asociacion di Controladornan Aereo, ACTAA, Elwin Rincones tambe a indica cu nan a keda contento di por a yega na un punto intermedio cu e minister pa loke ta trata uso di idioma, unda cu lo bin na un solucion temporal.