Situacion na aeropuerto cu toren y personal a normalisa

ORANJESTAD - Situacion na aeropuerto di Aruba a normalisa. Minister di transporte Otmar Oduber a confirma na NoticiaCla.com diadomingo mainta cu despues di un reunion 9'or cu e gerencia y tambe ANSA, a tuma nota cu 'diripiente' tur controlador ta bek na trabou, pues cu e situacion ta ok atrobe. Vocero di aeropeurto Hendrik Croes tambe a confirma na NoticiaCla.com cu 'tur issues ta resolvi pa awe". "Nos a wordo avisa pa minister cu tur cos ta ok y cu toren (di control) lo tin personal (normal) awe. Esey no ta kita afo cu cos ta keda tenso, pero por lo menos pa awe, y pa e proximo oranan, lo no mester tin problema cu buelo y tampoco motibo pa sera aeropuerto 'atrobe'.

SITUACION ALGUN RATO PROME

Tabata apenas algun ora prome cu cos tabata mustra hopi diferente. Manera cu NoticiaCla.com a raporta algun rato prome, e aeropuerto Reina Beatrix a habri awe mainta atrobe 7’or pa operacion, despues cu e mester a 'sera porta' diasabra anochi pa falta di personal di toren di control (cu a meld ziek na grupo). Pero no tin garantia cu pa merdia e situacion ta mescos” Asina fuentenan fidedigno na aeropuerto a confirma na NoticiaCla.com awe mainta. Di e 15 buelonan programa pa yega Aruba, por lo menos 4 a confirma cu a yega sin problema.  Toren di control tin hende trahando, cu ta pone cu e operacion por continua. “Pero merdia lo ta e problema pasobra nan no por duna garantia cu lo tin hende (pa opera y traha den toren)”. E sindicato di trahadonan di toren, sinembargo ta mustra cu ‘mester tin hende den toren pa cover’, pero cu ‘e situacion ta tenso’. 

PERSONAL TRAHANDO DEN TOREN

Despues cu e aeropuerto mester a sera ‘porta’ diasabra anochi 9’or pa motibo di falta di personal di controladornan aereo den toren, awe mainta tin un supervisor trahando cu ta manehando e situacion. Un total di 4 controlador a wordo manda cas ayera pa docter, y a haya carta di AO debi na presion halto na trabou. Pero awe mainta cos tabata ok atrobe ya cu un persona por a bin traha. Esey a pone cu for di 7’or awe mainta aeropuerto por a habri atrobe. “E warda di mainta nan tin un supervisor, pero pa merdia no tin confirmacion ainda si nan a logra haya hende pa traha”, e fuentenan a sigui bisa. NoticiaCla.com a compronde tambe cu mientras cu no ta responsabilidad di aeropuerto ( personal di toren ta cay bou di ANSA NV), a sugeri pa nan busca hende di afo mientrastanto.

REACCION SINDICATO STA

Awe mainta tempran NoticiaCla.com a confirma tambe cu presidente di e sindicato STA, Diego de Cuba, cu e trahadonan enberdad ta bou di un presion enorme y cu ‘esey ta pone cu nan no por concentra debidamente’. E informacion cu ta de Cuba ta orchestrando henter e asunto aki, e presidente ta desmenti. “Absolutamente no ta berdad” de Cuba a sigura NoticiaCla.com. E ta culpa e gerencia di ANSA NV, cu segun de Cuba ‘ta vertik pa comunica na ingles. Y lamentablemente tin hopi piloto Latino cu no ta domina esaki mucho bon, locual por trece confusion den e comunicacion cu tur su consecuencianan cu por ta fatal tambe” de Cuba a sigui bisa. “Mester por comunica den e idioma Spaño tambe. Hopi caminda den region ta asina” de Cuba a bisa.

SITUACION MERDIA

Pa loke ta e situacion merdia, e presidente di e sindicato a mustra mas prome mainta na NoticiaCla.com cu segun su informacion, e ta kere cu ‘mester tin hende pa cover, pero e situacion ta tenso’. Riba e asunto di AO, y cu e ta orchestrando esaki, de Cuba tabatin un reaccion tambe. “Un cos mi por bisa. STA no ta docter y no por determina AO di un empleado”. Di otro banda, di parti di fuentenan di aeropuerto nan no tin e siguransa pues cu cos lo ta ‘normal’ merdia. Lo tin cu wak kico ta sosode y cu si enberdad personal di toren presenta pa trabou.

SCHEDULE DI AVIONAN

Pa merdia pa atardi tin por lo menos 30 avion programa pa yega Aruba y mesun cantidad mas of menos pa bandona Aruba. Y mainta e cantidad ta mitar. For di e mitar ey, manera cu NoticiaCla.com a bisa caba, por lo menos 4 pa 5 a yega Aruba caba.