Aeropuerto cera pa falta di controladornan aereo malo

ORANJESTAD - Aeropuerto di Aruba Reina Beatrix a haye obliga di sera awe nochi 9'or debi cu no tin controladornan aereo pa opera den e toren. NoticiaCla.com tin informacion tambe cu por lo menos 4 controlador aereo a wordo manda nan docter di trabou y tur cuater lo a haya AO debi na presion halto. Mientrastanto e mandatario encarga cu aeropeurto Otmar Oduber a confirma cu enberdad aeropuerto a haye ta 'sera su portanan' awe nochi. Aeropeurto mientrastanto riba nan pagina di Facebook a pone un mensahe cu 'debi na circumstancianan fuera di control cu e organisacion di controladornan aereo, e schedule di aeroliñanan por keda afecta awe nochi y mayan durante curso di dia'. Ademas e mensahe tabata bisa pa 'check mas aleu cu cada aeroliña pa mas detayes riba buelonan for di y pa Aruba su aeropuerto". 

INSEL AIR

Di parti di CEO di Insel Air Aruba, Frederick Nuboer, a compronde cu un di nan buelonan pa Corsou a keda cancela debi na e ceramento di e aeropuerto awe nochi. Pero pa loke ta diadomingo, oficialmente no tin informacion riba e proceso di buelo. "Te na e momentonan aki nos no ta poni oficialmente na altura cu lo tin desrupcion di operacion di aeropuerto mayan" Nuboer a sigui bisa. 

REACCION CAMARA DI COMERCIO

Un di e gremionan comercial cu a reacciona mesora riba e noticia, ta Camara di Comercio. Su presidente Daphne Lejuez mesora a reacciona bisando cu " Mientras cu ta reconoce e derecho pa boga pa mihor calidad di bida y condicionan laboral husto, e derecho aki nunca mester wordo malusa pa negativamente impacta nos pais, den e caso specifico aki nos unico pilar economico (turismo), di cual casi tur habitante directamente y/of indirectamente ta biba di dje, no por afecta nos unico pilar economico".