FSTT cu un fundraising event cu un grandioso bingo como main event.

ORANJESTAD - Recientemente a tene un conferencia di prensa caminda Fundacion Social di Trahadornan den Telecomunicacion (FSTT) ta informa di un grandioso evento dia 31 di october riba parkinglot di SETAR Seroe Blanco. FSTT ta un fundacion cu pa algun aña caba ta haci diferente actividad pa recauda fondo pa yuda comunidad. Y p’esey tambe FSTT ta organizando e fundraising event cu lo ta dedica na yuda 2 instancia importante cu ta Rode Kruis y Mary Joan Foundation. Porta ta habri for di 6or pa disfruta di e ambiente. Pa e bingo por registra desde 6or y e lo cuminsa 8or. Lo ta un anochi yena cu diferente actividad, entre otro un Car Show y Dino Jump pa nos muchanan. Nos lo tin un tremendo bar na encargo di Rode Kruis. Alabez Rode Kruis lo tene un FoodDrive di cuminda pa por sigui yuda esnan den necesidad cu cada dia ta creciendo. Cuminda y/o articulonan cu Rode Kruis ta pidi ta entre otro: aroz; sucu, te, lechi y lech’i cofi, cuminda di bleki (manera corned beef, potham etc.), macaroni, pindakaas, sopi continental, hariña di funchi y di pan, pan, conrflakes, spaghetti, quackerpap, azeta, manteca, habon di baña, mistolin, mop, papel sanitario, clorox, tang, babyfood, lech’i baby, pampers y wipes. Mary Joan Foundation lo tin un suculento Cushina y un wine tasting booth. E wine tasting ta di un biña nobo AIX Rose di Francia cu a duna di nan banda pa coopera cu e evento. Tambe nos ta tin fundacion BOB (Bevolkings Onderzoek Borstkanker) cu lo tin cake sale station dushi prepara. Ticket pa bingo ta Afl.10 y ta obtenibel na Rode Kruis y su voluntarionan, na Mary Joan Foundation y miembronan di FSTT. E Bingo lo tin awg. 5500 na premio y tambe nos lo tin rifa y tremendo doorprize. Musica lo ta den man di Rincon Boys y Steel Edition.FSTT ta invita pueblo di Aruba pa sostene e actividad cu un man, cumpra un ticket di bingo of bin pasa un momento alegre dia 31. Y como cu ta Halloween, lo tin un premio pa e mihor costume.