Hulanda: Supervision financiero pa Corsou y St Maarten ta keda!

DEN HAAG – E supervision financiero pa St Maarten y Corsou ta keda por lo pronto. Asina conseho di minister di Reino a dicidi awe mainta, riba conseho di un comision cu a haci e evaluacion necesario. Segun e comision di evaluacion, e dos paisnan menciona no a cumpli cu completo y den forma independiente na e normanan. Como tal esaki ta keda

COMENTARIO DI E COMISION

Segun e comision, ‘tanto Corsou como St Maarten a logra mehoracion financiero y ta reduciendo e retraso den entrada y e cuentanan anual. Pero sinembargo nan no a yega e punto ainda cu por determina cu nan por maneha nan propio institucion y maneha esaki di tal forma cu por tin un situacion financiero structural sano. Banda di esaki, mester reduci e atraso di e cuentanan annual ainda mas.

E LEY

E ley RFT (Rijks Financieel Toezicht) ta prescribi cu conseho di minister di Rieno despues di 5 aña di introduccion di e ley (10-10-10) ta dicidi si no mester cumpli mas cu e compromiso aki. Pa por yega na e decision aki, nan ta sigui e conseho di e comision di evaluacion RFT di cual nan por desvia solamente cu motivacion. Y segun conseho di minister di Reino, nan no ta mira motibo pa desvia di e conseho di e comision. E constelacion di e comision ta di  Ron Gomes Casseres (presidente), Reuben Essed (miembro St Maarten), Edelmiro Seferina (miembro pa Corsou) y Marcel van Gastel (miembro pa Hulanda).