Actor Tyrese Gibson na Aruba otro siman pa AIFF 2015

ORANJESTAD – Conocido actor mericano Tyrese Gibson di Fast & Furious y Transformers, lo ta na Aruba otro siman pa e Aruba International Film Festival. Recientemente a wordo anuncia cu di 7 pa 11 di october lo tuma lugar e di 5 edicion di Aruba Film Fesitval. Manera tur aña e festival aki ta trece diferente actornan renombra y e aña aki esaki no ta diferente.

TYRESE GIBSON

Tyrese Gibson pues ta actor conoci di Fast & Furious y Transformers. Tyrese hunto cu Vin Diesel y Paul Walker ta e famoso trio di Fast & Furious. E aña aki AIFF tin e honor di ricibi Tyrese Gibson cu lo tey pa estrena Shame, cual ta un short film di Tyrese y e ganadora di premio Oscar, Jennifer Hudson. Ariba su pagina di Facebook Tyrese a pone lo siguiente: ‘Aruba Film Festival I'm soooooo grateful I will see you next week!!! My short film SHAME is being highlighted!!!! So grateful!!!’. Esaki sigur ta un tremendo cobertura pa AIFF como tambe Aruba mirando cu Tyrese tin mas di 27 miyon followers y e comentario aki so a genera 9 mil reaccion te cu awor. Aruba completo ta wordo invita pa presencia e di 5 edicion di Aruba International Film Festival. Keda pendiente pa mas informacion cu lo ta saliendo den e proximo dianan. Pa mas informacion, por bishita e festival website na www.aiff.aw