Castigo di prison pa hobennan cu a abusa sexualmente di polis

ORANJESTAD – Huez den prome instancia awe mainta a sentencia e dos hobennan M.E.G.D. y L.N.C. (21), acusa di a tene sex cu un persona cu tabata fey tino y no por a expresa su opinion, na castigo di 2 aña incondicional di prison. Vocero di ministerio publico Ann Angela a confirma awe mainta tambe cu ademas nan a wordo acusa di a laga e persona aki intencionalmente den un situacion fey tino, sunu y desampara den un hanchi banda di Eagle Tennisclub riba 20 di december 2014.

CASTIGO

Nan a wordo condena pa 2 aña di castigo incondicional pa e prome hecho, esta, sex cu un persona cu tabata fey tino y no por a expresa su opinion riba 20 di december 2014. Nan tin cu paga schadevergoeding di 2000 florin cada uno na e victima.

VRIJSPRAAK

Nan a haya vrijspraak pa e di dos hecho, esta, cu a laga e persona atras sunu y den estado desampara den e hanchi. Fiscal a exigi contra nan cuatro aña di castigo durante tratamento di e caso tres siman pasa.

VIDEO COMPROMETEDOR

E video cu defensa a trece pa dilanti, esta, di e victima festehando riba un boto y cual video a bay viral riba rednan social, a haci cu e castigo a baha. Huez a considera cu e ta castigabel, pues a reduci e castigo pa e dos personanan aki.