Bermudez: Ta premira porcentahe di ABB entre 6 y 7%

ORANJESTAD – Prome cu fin di otro siman gobierno ta haya sa e porcentahe cu cual lo por introduci e asina yama ABB (Algemene Bestedings Belasting). Asina e mandatario responsabel pa finanza publico, Angel Bermudez a confia na NoticiaCla.com diahuebs. Te cu awor, e mandatario ta stens cu e lo por bira entre 6 of 7%. Den pasado caba a menciona esaki aunke cu no kier a bay den mucho detayes. E posibilidadnan ta entre 4 te cu 8%, y ta pa otro siman gobierno por haci un ‘escoho’ definitivo di e tasa cu e mester bira.

INTENCION DI ABB

E intencion segun e mandatario, ta cu e introduccion di e ABB, lo elimina pa gran parti, e cumulacion cu tin den AZV y BBO. Pa por aplica solamente un tarifa pa ABB, bo mester busca e average, pero tambe e cantidad di cada grupo cu ta wordo importa, pa bo yega na un tarifa cu ta un averahe di tur loke aworaki, e 13 tarifanan ta genera. Un ley nobo manera esun di ABB mester genera loke e leynan anticua ta genera. “No por ta asina cu e ta bay genera menos cu loke cu e ta genera aworaki” Bermudez ta bisa. Obviamente no kier pa nan bay hopi den exceso tampoco. Pero eyden e calculacionnan mester ta hopi cauteloso.

FINETUNING DI ABB PA TARIFA EXACTO

E mandatario ta kere cu basa riba e informacion cu e tin aworaki, den e rumbo di 6% ta ketobay elaborando. CBS a traha scenario di un variacion di posibilidad, y aworaki e finetuning ta tumando lugar. “Manera e ta mustra, e ta leun towards 6 of 7% , pero esey pa otro siman lo haya un decision definitivo cu cual mi por bay conseho di minister cun’e” e mandatario a sigura NoticiaCla.com.

ABB LO REEMPLASA VARIOS IMPUESTO

E intencion di e ley di ABB, tin cu bay reemplasa entre otro BBO, BAZV, Succesiebelasting, verkopingsbelasting, zegelbelasting, milieu belasting riba verhuur autos y algun otro impuesto cu no ta genera sumanan cu mester ta balelapena cu mester tene un personal den belastingdienst pa por ehecuta nan. 

audio di e combersacion cu minister Angel Bermudez riba porcentahe di ABB