Bermudez conciente di resistencia cambio pa pago nummerplaat

ORANJESTAD – Cu binimento di e cambio pa paga pa gasoline en bes di number di auto na belasting kantoor, ta bin e critica riba su hustificacion of no. E mandatario encarga cu e proyecto, Angel Bermudez, a confirma na NoticiaCla.com cu e ta conciente di e critica aki. “Esun cu ta hasi mas uso di nos careteranan, lo tin cu paga mas pa esey” Bermudez a bisa. E ta un impuesto riba usuario. “Esey ta e parti husto den dje” e mandatario a sigui bisa. Naturalmente ora cu bo kier crea un regla a base di eficacia, tin cierto situacionnan cu kizas ta sali un tiki menos beneficioso cu e ta aworaki” Bermudez a bisa. Pero pa e grupo grandi cu pa nan si ta conta e principio di hustificacion, e ta husto.

MAYORIA TA OK

Segun e mandatario, un gran parti di e grupo di automobilistanan no tin problema cu e sistema aki pasobra pa nan e ta cubri loke nan ta pagando aworaki den avanse ora cu aña habri of aña sera. “E ta bira gewoon un pay-as-you-system’ caminda bo ta haci uso di nos careteranan segun bo ta core.

CALCULACION TA HUSTIFICA E IDEA

Tin e pensamento cu un persona cu ta paga e suma maximo di 320 florin na number di auto pa aña, y cu ta core hopi mas den aña cu e suma ey, ta bay paga mas cu esey den aña. “E idea no ta cu den su totalidad e tin cu bay genera mas placa pa caha di gobierno. A pidi CBS un calculacion pa gobierno pa midi e suma y tarifa di e accijns adicional. Tin cu tene cuenta cu vehiculo di diesel, cu ta paga 2x biaha mas na wegenbelasting. Pero di otro banda, e accijns riba diesel ta menos cu esun riba gasoline.

GRANDURA DI AUTO

Tambe bo tin e vehiculo grandi manera bus y truck, cu tin otro prijs cu nan ta paga na e impuesto. Esaki tin cu calcula tur hunto pa un ‘gewogen gemiddelde’ osea un promedio balansa, pa asina basa riba e cantidad di vehiculo cu tin na Aruba (60 mil riba gasoline y 9 mil riba diesel), pa yega na un calculacion di e accijns den su totalidad pa cubri loke nan ta paga of ta supose di paga segun e ley existente. Como tal e mester ta ‘budget neutral’, segun e mandatario.

PERCEPCION CU E TA IDEA INHUSTO

Pa esnan cu ta sigui cu e percepcion cu nan tin cu bay paga mas, semper tin e pensamento cu tin grupo cu tin menos placa cu ta core menos, cu e averahe. E ta un elemento cu bo ta haya ora cu bo basa un areglo manera esaki riba eficacia y tin toch un principio di hustificacion aden. Esun cu mas uza, caretera, mas e ta paga.