A reuni cu tur diferente partners y cabesante di scol riba Veilige Scholen

ORANJESTAD – Gobierno a reuni cu tur diferente partners y cabesante di scol riba Veilige Scholen. Esaki segun un comunicado emiti pa ministerio di enseñansa awe nochi. Segun e comunicado, e meta ta pa tur scol na Aruba ta sano y sigur, y tur maestro y mucha mester tin un solo cos como nan enfoke y esey ta “Enseñansa”. Minister Michelle Hooyboer-Winklaar a subraya cu e palabranan aki e esencia di e proyecto Veilige Scholen y con importante e proyecto ta pa Aruba.

HISTORIA LARGO

E proyecto tin un historia largo y e mandatario ta determina pa wak tur hende y instancia trahando riba un liña pa realisa e deseo y necesidad pa tur scol ta “healthy and safe”. E siman aki a trece hunto e cabesantenan di scol hunto cu otro stakeholders y a presenta e proyecto y pidi pa e input di parti di e scolnan. Tin cierto cosnan palabra, tin protocolnan firma, pero falta pa yega na sincronisacion di e proyecto den su totalidad. Loke a haci durante di e reunion ta duna tur invitado un “update” di kico precies ta tumando luga, kico a tuma luga caba y kico ta bay pasa for di awo pa fin di aña escolar 2015/2016. A papia di “knelpunten” y ideanan, y a presenta e diferente partnernan – social, siguridad, salubridad, etc., pues tur actor cu ta hunga un rol pa haci di e proyecto uno exitoso.

TUR HENDE RIBA MESUN LIÑA

Hooyboer-Winklaar a comenta cu e direccion awo ta pa tur hende ta riba e mesun liña, a scucha e cabesantenan di scol y mester sincronisa tur partner cu otro pa logra e introduccion di e programa cu lo resulta den scolnan sano y sigur. E parti di prevencion ta hopi importante den logra cu e scolnan ta berdaderamente sigur. E meta final ta pa por brinda bonbini na muchanan y maestronan den espacionan sigur pa nan por concentra riba duna y tuma les y asina catalisa e muchanan pa nan por yega na un miho futuro. Tambe presente na e presentacion tabata Bert Wielega kende ta miembro di directiva di Telefon pa Hubentud, e organisacion cu a inicia hunto cu “Stichting Maatschappij en Criminaliteit” e proceso pa yega na e proyecto Veilige Scholen.

INVESTIGACION

E idea a bin durante cu e fundacion a haci un investigacion “Jeugddelincuentiegedrag” y e meta a bira pa bin cu un proyecto pa haci scolnan na Aruba mas sigur. Telefon pa Hubentud a produci un buki cu protocolnan, incluyendo instruccionnan di kico pa haci si tin un scopet na scol, si descubri cu un mucha tin experiencia di abuso, of si tin un mayor cu bira agresivo, entre otro.

DEPARTAMENTONAN ENVOLVI

Wielega a bisa cu a envolve Directie Sociale Zaken, Wit Gele Kruis, Departamento di Enseñansa, Telefon pa Hubentud y otro organisacionnan den e proceso pa bin cu solucionnan pa problemanan den of rond scol. Tin un plataforma ta trahando riba e proyecto. Telefon pa Hubentud ta contento cu na 2012 Departamento di Enseñansa a uni na e proyecto pasobra nan tin un plataforma mas grandi pa traha cune, y un organisacion chikito manera Telefon pa Hubentud no por carga un proyecto asina grandi su so. El a splica cu a haya feedback tocante trahamento preventivo versus traha curativo; tambe a haya feedback di un cabesante cu a bisa cu e ta preocupa pa bendemento di droga y hende cu ta “zwerf” rond di scol y hendenan cu no ta pertenece na e scol cu ta subi tereno di scol cu facilidad, entre otro. Bert Wielega a bisa cu e Telefon pa Hubentud ta hopi contento cu e colaboracion cu a wordo estableci, y cu tin iniciativanan manera e “gedragscode” cu Minister Hooyboer-Winklaar a presenta, proyectonan di termento di Telefon pa Hubentud, etc. Un punto di atencion ta e comunicacion entre scol y polis, cual tur dos partido kier fortifica. El a agrega cu aki algun luna lo tene un encuentro atrobe pa informa e scolnan con leu e proyecto ta, pero tambe pa puntra pa informacion cu ta yuda realisa e proyecto.