No a tuma decision final ainda riba pago accijns enves di nummerplaat

ORANJESTAD – Mientras cu e decision pa cambia e sistema di atende cu impuesto di auto otro aña ta un pensamento cu ta sali for di ministerio di finanzas berdad, e informacion cu e decision ta tuma caba, no ta berdad. “Ningun decision a wordo tuma ainda” minister Angel Bermudez a sigura NoticiaCla.com diahuebs atardi. Ta te ora cu e wordo aproba den conseho di minister, y despues parlamento vota y aprob’e, por bisa cu e ta aproba. “Prome cu esey no”, Bermudez a bisa.

E IDEA TA ESUN MAS SIGUR

Berdad ta si, cu e ta e idea mas sigur awor cu gobierno kier bin cun’e pa cambio di aña. E idea pa hala for di e ‘pesadia’ di paga number di auto tur aña, cu nummerplaat nobo tur aña, paramento den rij tur aña y control consecuente di polis tur aña. Tur esey lo por ta pa pasado otro aña, si ta pa minister Bermudez.

MAS CONTROL

E intencion di gobierno, ta pa otro aña envez di paga na SIAD pa bo number di auto, no mester di e parti di control mas, e parti di supervision na belasting dienst, pasobra e ora ey ‘segun cu bo ta tank (bo auto) bo ta contribui via e accijns. “Nos ta hinke (belasting) den e accijns existente y segun cu bo yena bo tanki tur luna of tur siman, e ora por medio di e accijns e ora bo no tin mester di e control mas manera awor cu plachi chikito, polis mester controla etc etc”.

PARTI TECNICO

E parti tecnico ainda ta wordo traha ariba. “E idea ta cu tin cu bin un plachi original. Nos no sa e color ainda. Nos no sa con e dibuho ta bay ta. Nos lo por keda cu e plachi blauw blanco manera cu e ta aworaki te cu den curso di otro aña. Loke ta bin acerca ta un kentekenbewijs, caminda cu bo ta haya un sorto di carnet, cu ta demostra cu abo como persona of como negoshi tin un cierto number. E number ta mara na bo persoonsnummer cu ta e number na belasting dienst. E number ey ta keda bo number.

ALTERNATIVA POSIBEL

Mientras e discusion por sigui riba e tema aki, tin mas posibilidadnan cu por keda introduci, fuera di esun menciona di paga mas pa accijns, pero e mandatario no ta mira cu esey lo sosode. E comision nombra pa e mandatario na mei ultimo ta mustra mas posibilidad, pero esaki ta esun cu nan a yega na dje cu ta e sistema ‘mas eficaz’, na e momentonan aki, compara cu e forma cu e ta wordo cobra aworaki. E otro scenario tabata plachi number cu chip aden unda cu bo por wak exactamente ken a paga y ken no. Pero esaki ta exigi un inversion financiero mucho halto cu no ta wordo sugeri pa implementacion.

IDEA TA DI MINISTERIO FINANZA

E idea principal ta uno di e ministerio di Bermudez. “Ministerraad den e simannan benidero mester bay aprobe y despues e ta bay den e trayecto legislativo cu e intencion cu prome cu fin di aña, parlamento aproba esaki. “E ora ey e por ta un done deal, si e pasa den full e trayecto”.

audio di combersacion cu minister Angel Bermudez cu ta bisa cu no a dicidi ainda riba asunto di nummerplaat pa 2016