Lejuez: Implementacion (di parkeermeters) ta otro cu a wordo palabra

ORANJESTAD – E ‘critica’ e siman aki y ‘sugerencia’ e siman di parti di Camara di Comercio (KvK) contra e parkeermeter y tram e siman aki, por ta comprendibel cu ta zona como ‘mosterd na de maaltijd’, esta mucho laat. Presidente di Camara di Comercio (KvK) Daphne Lejuez awe a splica NoticiaCla.com cu sinembargo, nan tabatin nan motibo pa bin cu nan comentario awor y no prome. Unabez cu e comentarionan di KvK a bin e siman aki, hopi tabata e critica cu e comentarionan tabata ‘mucho laat’, y cu KvK semper tabata parti di e combersacionnan di e proyectonan menciona. Pues no ta compronde pakico ‘diripiente’ ta bin cu e critica aki awor.

IMPLEMENTACION OTRO

E motibo pa cual KvK a opta pa bin cu e comentario y ‘critica’ contra e dos proyectonan, ta interesante:” “Obviamente cu nos ta wak e implementacion (di parkeermeter y proyecto di tram) ta otro di locual a wordo palabra. Y tambe nos a duna e tempo pa e comerciantenan por duna nos e feedback despues di a experencia esaki pa nos wak unda e problema ta sinta. P'esey nos a warda un rato” Lejuez a sigura NoticiaCla.com.

MOSTERD NA DE MAALTIJD

Segun Lejuez, contrario cu hende por kere, KvK no tabata parti di e proceso y ehecucion di e diferente plannan aki. Como tal pa nan tabata sorpresa ora cu e proyectonan aki a desaroya, y mas ainda e forma den cual nan a wordo desaroya. “Nos mes no tabata sa kico ta bay bini y con e ta bay wordo ehecuta. E no ta necesariamente "mosterd na de maaltijd” Lejuez ta sigura. E tabata mas bien un sorpresa di e manera con e la wordo ehecuta.

INVOLUCRA GREMIO COMERCIAL

Esaki por zona straño mirando cu tabatin e percepcion cu KvK como gremio comercial, a wordo involucra den tur e ideanan aki durante p.e. dialogo social. Pues con bin diripiente KvK no sa di nada di esaki y ta bin como un sorpresa. “Nos a wordo involucra den e plan, y haya plan di e cambionan den caya grandi. Cu lo tin un tram, cu lo tin parkeergarages parkeermeters. Pero e ehecucion di esaki ora ya e tabata cla pa ehecuta, nos no a wordo involucra”. No tabatin palabracion ni cu comercio, ni cu camara di comercio. “Nos no tabata parti di esaki. E tabata un sorpresa total”.