WEB a entrega su plan di horcan 2015 na oficina di calamidad

ORANJESTAD – Recientemente director interino sr. Luis Oduber, a entrega WEB Aruba su Plan di Horcan 2015 na sr. Jaime Donata, hefe saliente di Bureau Rampenbestrijding. Cada aña di nobo instancianan di gobierno y companianan di utilidad tin cu revisa nan plan di horcan, pa asina actualisa tur dato y procedura pa ta prepara pa un posibel pasada di Horcan. Segun e Plan di Horcan di Aruba (“Rampbestrijdingsplan Orkaan Aruba”), WEB tin e tarea pa percura pa awa di bebe y conhuntamente cu Elmar, pa electricidad pa henter Aruba.

REVISION PLAN DI HORCAN

Den e cuadro aki sr. Erwin Boekhoudt, hefe di departamento Enterprise Risk Management di WEB, a coordina revision di e plan di horcan di WEB. E plan aki ta contene proceduranan y strategia pa garantisa seguridad di tur empleado y bishitante y minimalisa daño na instalacionnan y edificio di WEB. Tambe e plan ta percura pa mantene produccion di awa y coriente mas tanto posibel y despues di pasada di horcan, recupera e suministro di awa y coriente mas liher posibel, pero na un manera responsabel.

GRADICIMENTO

WEB Aruba ta gradici Bureau Rampenbestrijding pa su aporte na e plan aki y tambe pa su guia pa maneho di crisis na Aruba.