KvK: Proyecto di tram no ta funcionando manera cu e ta awor

ORANJESTAD – E intencion di tram no ta funcionando manera cu e ta awor. Asina Camara di Comercio (KvK) ta splica den un comunicado emiti. Segun e gremio comercial, (den nan di dos analisis e siman aki riba temanan al caso) recientemente durante un encuentro comerciantenan presente a duna feedback tambe di nan experencia cu e tram cu ya caba tin varios luna den funcion.

INTENCION DI FUNCION DI E TRAM

Aki, segun KVK, e comerciantenan ta bisa cu e intencion di e tram tabata pa fungi primordialmente como un atraccion y transporte pa den Caya Grandi y vecindario, pa asina esnan cu ta hasi uso di e tram (entre otro turista) por baha, cana y shop den e diferente tiendanan riba e ruta. Sinembargo, segun KvK, e situacion actual ta indica cu e personanan, tanto turista como local, ta haci uso di e tram mas tanto como tour y pasa tempo pa dal un buelta den centro di ciudad y ta baha for di e tram solamente ora cu esaki yega bek na e sitio caminda nan a subi e tram, locual ta hasi cu no ta cumpliendo cu e meta principal di e tram.

STIMULA PASAHERO PA USA TRAM DI OTRO FORMA

E comerciantenan ta di opinion cu por stimula e pasaheronan pa baha di e tram si introduci algun cambio, p.e. pone e tram core segun un schedule fiho y introduci algun “halte” caminda cu e tram ta keda para pa cierto tempo y caminda cu tur pasahero ta wordo stimula pa baha for di e tram na e punto(nan) indica. Aki lo por informa e pasahero di e posibilidad pa regresa cu un otro tram of hasta di cana bek (sea ful e ruta of parti di esaki).

FALTA DI SINCRONISACION

Un otro punto cu a wordo treci dilanti ta cu ta sinti falta di sincronisacion di mercadeo y consecuentemente e turistanan no ta haya suficiente informacion di tur locual cu e diferente tiendanan y otro negoshinan tin di ofrece. Promocion di e negoshinan den centro ta wordo obstaculisa como cu no ta permiti pa parti flyers o duna material promocional na e pasaheronan den e tram. Mester por ta posibel pa introduci un forma pa e diferente negoshinan por promove nan mes den e tram.

DIFICULTAD PA HAYA ACCESO NA EDIFICIO

Adicionalmente varios di esnan presente a mustra riba e dificultad cu tin pa haya acceso na nan edificio pa por ehempel entrega di mercancia of pikimento di sushi. E situacion aki a haci cu varios potencial inversionista a dicidi pa no habri negoshi den centro di ciudad. Mirando cu e proyecto di tram no ta un fin riba su mes, pero mas bien un forma pa revitalisa centro di capital di Aruba, e forma cu e ta wordo opera semper mester por cumpli cu e meta aki, y sigur no obstaculisa inversion. Mester tin un forma pa acomoda e necesidadnan di e e inversionistanan den ciudad. Esaki lo por logra pa medio di comunicacion directo entre comercio y esnan responsabel pa maneho di e tram.

AINDA PROYECTO EMBEYECIMENTO NO TA CLA

Por ultimo e comerciantenan a indica cu nan ta en espera pa gobierno finalisa e proyecto completo di embeyecimento di centro di ciudad manera a priminti inicialmente y pa implementa tur aspecto/fase di esaki cu falta ainda. Ta trata di p.e. introduci terrasnan y parkeergarages. Di e forma aki downtown lo tin un caracter unico y ta crea e oportunidad pa por competi cu e tiendanan y malls pafo di centro di ciudad. Pa logra un mihor sincronisacion entre e necesidanan di nos economia y e servicionan cu nos sector publico ta ofrece KvK ta sigui boga pa mas dialogo y a base di e feedback ricibi por mira cu tin e necesidad di parti di esnan directamente involvi pa trece nan experencia y inkietudnan na atencion di gobierno y pa conhuntamente logra e meta comun di embeyece y revitalisa e centro di Oranjestad. Manera semper, Camara di Comercio y Industria ta dispuesto pa yuda den cualkier iniciativa cu ta beneficia comercio y comunidad en general.