IHRA 2014: Cody Bayus a uza su premio combina cu su honeymoon.

ORANJESTAD - Pa 9 aña consecutivo sr. Juancho Werleman ta encarga cu un sponsorship pa International Hot Rod Association y tambe encarga di algun trabaonan pa IHRA aki na Aruba. IHRA e di dos organisacion mas grandi na mundo pa loke ta drag racing, tin alrededor 109 pista na Merca, Canada, Bahamas y Hawaii. Aruba a bira miembro di e prestigioso organisacion aki na 2004. Cu mas di 15 mil coredor y un cantidad abonado y miembronan loke ta trata e DRM magazine y sin laga afo esnan cu ta bishita e website di IHRA ta pone cu e promocion pa Aruba ta bira algo inmenso.

E diferencia:

Contrario na loke otronan ta paga pa promocion na Merca y sin laga afo e sumanan astronomico cu nan ta ricibi como sosten di ATA y Ministerio di Turismo, e comision dirigi pa sr. Werleman y Don Flip Racing Team Aruba, ta traha completamente los y sin apoyo alguno di e dos instancianan. Esaki a pone cu mas cu claro tin mas espacio pa traha suheto na e desaroyonan cu tin na Aruba y tambe den e mundo di drag racing. “Nos ta traha independiente, nos no ta mara na merced di ningun politico of instancia pa haña sponsorship y nos ta deal cu real World Champions pa promociona Aruba y tur loke ta sosode den e deporte di drag racing aki na Aruba. Nos aceso na medionan di IHRA ta incondicional y completamente gratis. Nos por uza e medionan aki tur dia mes si nos kier pa promociona Aruba y su dragracing, sin paga un cent preto. Esaki otronan no por hasi sin mas”, segun sr. Juancho Werleman. “Na 2007 nos a wordo letterlijk cori door di un ehecutivo di ATA paso nan tawata tin otro interes y aña pasa ainda Ministerio di Turismo ta laga nos na caya 24 ora promer cu yegada di un di e VIP-nan di IHRA. Dus esey pa mi ta mas cu suficiente pa realisa cu nos mester mantene distancia pa por traha comfortabel pa nos por yega nos metanan. No ta tur cos mester depende di politica”. Werleman ta afirma. “Tur loke nos a bin ta hasi den e ultimo 9 añanan tawata danki na e.o. Brazilian Flash Racing Team y ultimamente Don Flip Racing Team cu a percura tambe pa e promocionnan bai mas leu ainda afiliando na Fun In The Sun Racing Series cu ta bai culmina na Bradenton, Florida y tambe e Overkill Winternationals cu lo tuma lugar na Gainesville, Florida. Den e ultimo 9 añanan World Championship di IHRA ta tuma lugar na Memphis, Tennessee y sigur esaki ta conta cu un participacion masal di coredornan di tur pais cu ta afilia cu IHRA. Aruba su track record ta sublime den e World Finals ya cu nos tin un World Champion na 2004 cu ta sr. Jonathan Tromp y tambe un Sub Campeon Mundial di IHRA cu ta sr. Jean Carlo Ras. Sin lubida cu aña pasa e joven di apenas 17 aña Leendrick Lacle a sa di yega te den e semi finals di World Champion Junior Dragsters”, Werleman ta finalisa.

Occasion special pa Cody y Lyndsay Bayus, IHRA World Champion 2014:

E aña aki e bishita di un IHRA World Champion tawata un occasion super special. Cody Bayus ganador di e titulo maximo di IHRA Top ET a drenta enlace matrimonial riba e diasabra promer cu nan a viaha pa Aruba. Esaki ta nifica cu on top di a bin goza di nan premio como World Champion, nan a bin pasa nan Honeymoon tambe! Algo cu e comision no ta custuma cu ne! Pero apesar di esey a sa di ahusta e calendario pa asina duna pareha Bayus e experiencia unico di tur loke Aruba tin di ofrece. A cuminsa na delibera cu e doñonan di website www.aroundaruba.com y tambe doñonan di restaurantnan pa por hasi e vakantie aki algo unico pa e pareha Bayus. Y mas claro esaki a duna su resultado den tur sentido di palabra.

Sponsors at work:

Pareha Bayus a wordo ricibi na Tropicana Aruba Resorts pa sr. Rafael Wever, Guest Relations, Reservation & Yield Manager. Tropicana Aruba Resort hunto cu TropClub Casino & Double Down Sportsbar ta host IHRA World Champions pa algun aña caba na un forma unico.

Sr. Wilfred Trimon, Casino Manager di Tropclub Casino y Double Down Sports Bar a honra e pareha na very first treat y sigur esaki tawata “the utmost best first impression” di facilidadnan di Tropclub International aki na Aruba. Tambe sr. Philip Merryweather di www.aroundaruba.com combina cu Around Aruba Tours a percura pa e pareha por a bishita The Red Fish Restaurant na Orange Plaza, Philip Animal Garden y sigur tambe a host un ATV Tour pa mas di 3 ora den e partinan nort di Aruba cu ta ilustra nos naturalesa y historia. Pa complete un bishita al estilo World Champion, sra. Omira Botta owner/director di El Gaucho Restaurant a sa di host un farewell dinner pa e pareha cual sigur a cai na gusto ora cu e crew di El Gaucho Restaurant a sa di presenta nan simply best Argentine Grill, Lobster Surf and Turf y e Catch of the Day. Tur esaki combina cu e Sangria original di El Gaucho Restaurant.

Palabra di gradicimiento:

“Percura pa hasi un papel pa Aruba den un forma independiente y sin support di e instancianan oficial no ta fasil, pero sigur no imposibel. Alcontrario esaki a siña nos bai all out pa hasi cada bishita di un IHRA World Champion algo unico. Sponsornan manera More4Less Carrental, Tropicana Aruba Resorts and Casino y Tropclub Casino & Double Down Sports bar, www.aroundaruba.com y Around Aruba Tours y mas cu claro El Gaucho Restaurant ta algo cu semper nos a sa di aprecia y ta p'esey tambe ta honra nan riba e website di IHRA y den e revistanan di DRM na un forma incondicional. Nos meta ta pa saca cara di Aruba den e forma mas informal cu ta posibel. Esaki ta e mihor manera pa duna cada un di nos bishitante. Esey ta hasi tambe cu input di cada sponsor ta priceless. Di nos banda nos lo percura pa nan haña the utmost best exposure tambe den e medionan local y e vooral den e media network di IHRA cu ta un di esnan mas grandi den e deporte di dragracing na mundo” Werleman ta termina.