Prome ministernan ta hala orea di gobierno di Reino den carta

NEW YORK – Den un carta cu un tono hopi firme, -cu NoticiaCla.com a pone su man ariba- , e prome ministernan di Aruba, Corsou y St Maarten ta pone presidente di conseho di minister di Reino (minister presidente Mark Rutte) na altura cu nan no ta contento cu e actitud di gobierno di Reino y cu nan no ta dispuesto pa tuma ‘ordo’ sin mas. Acerca ta bin cu nan kier pa Hulanda, -mescos cu tur otro partnernan den Reino-, tene su mes na statuut y conseho di Raad van State. Un carta cu e tono di ‘sino fono’, y mas remarcabel, manda for di New York pa Hulanda durante cu nan tur 4 (minister presidentenan) ainda tabata hunto pa e reunionnan di Nacionnan Uni.

POTRET

Riba su mes e ta remarcable cu di un banda, tur cos tabata mustra cu tur ta riba mesun liña, sacando potret cu otro constantemente, mientras cu nan tabata prepara e carta y no a warda pa mand'e for di nan teritorio, sino for di New York caba.

RAAD VAN STATE

E base di e carta ta e conseho recien di Raad van State cu a mustra e fayo cu segun RvS, Hulanda a comete cu e dunamento di e KB (instruccion) aña pasa pa motibo di incumplimento di e presupuesto 2014. Den e carta, e tres firmantenan (prome ministernan) ta mustra nan sosten pa cu e conseho ey y ta relata tur e puntonan un pa un, pa mustra cu tur tres isla ta sostene esaki completamente. Un conseho cu prome cu RvS a bin cu nan conseho (casi un aña despues), ya caba Raad van Advies (RvA) na Aruba mes caba a mustra for di december 2014 di e fayo di e otorgamento di e KB.

FORMULACION STATUUT

Mas prome, e tres firmantenan ta para keto na e hecho, -y a uza e lugar Nacionnan Uni como un simbolo pa mustra nan punto mas fuerte ainda-, cu tempo cu Hulanda a formula e statuut actual, e tempo ey caba Nacionnan Uni tabatin su duda den intencion di Hulanda cu si enberdad e pais lo tabata cla pa decolonisa e islanan den e status nobo. De hecho, e tres firmantenan ta mustra e miedo di Nacionnan Uni cu por a uza e posicion di gobernador pa nan fin pa actua contra regla riba statuut, trapando asina riba e autonomia di e islanan caribense den Reino Hulandes. “Ta intervencion di e premier Antiano e tempo ey y e delegado di Aruba Yrausquin, cu a evita cu Hulanda por a haci tal, door di deshaci di un articulo di e statuut. Cu e hechonan aki den mente, e firmantenan di e carta di e siman aki a vocifera nan mes fuerte contra minister Rutte.

DESOBEDIENCIA

Loke ta hala atencion ta, e mensahe cu e carta ta laga atras. “Si den futuro, atrobe presenta un KB na gobernador cu un instruccion cu ta viola e posicion di gobernador, e tres paisnan firmante, conforme e conseho actual di Raad van State, lo ‘no duna oido na e instruccion aki y no coopera cu esaki’. Lo sigui duna sosten na gobernadornan den nan ehecucion di e statuut manera cu e ta ancra den ley.

DAÑO FINANCIERO

Tambe ta hala atencion cu Aruba ta remarca na Hulanda cu debi na e suceso di aña pasa, Aruba a sufri hopi daño financiero economico. Tur pasobra gobierno di Reino a actua incorecto. St Maarten tambe a mustra su desaprobacion cu nan KB’nan, basa riba integridad y cu door di actua incorecto, e ta atacha e reputacion di hende.

MANTENE NETCHI NA PALABRACION Y LEY

Finalmente, e firmantenan ta mustra cu ta di gran importancia pa den futuro, tur pais den Reino Hulandes mantene nan mes na e statuut y e interpretacion di esaki, y cu e interpretacion di esaki tuma lugar segun e conseho acorda (di RvS). Lesa e carta completo aki.