Gobierno di St Maarten a cay

PHILLIPSBURG - Gobierno di Marcel Gumbs a cay na St Maarten. Esaki a sosode algo despues di 12'or y mei ora cu parlamento a pasa un mocion di desconfiansa, origina pa parlamentario di partido democratico Sarah Wescot Williams, cu un votacion di 8-7. Miembronan di coalicion Silvio Matser, Maurice Lake y Frans Richardson a 'bula cura' y sostene e mocion di oposion. Cu esaki, e di 4 gabinete ta cay desde cu e isla a bira un pais autonomo na 10-10-10.  Esnan cu a vota na fabor di e mocion di desconfiansa tabata Silveria Jacobs, Christophe Emmanuel, George Pantophlet, William Marlin (National Alliance), Sarah Wescot-Williams (Democratic Party), Frans Richardson (independent), Maurice Lake and Silvio Matser (United People’s party). E ultimonan cu a 'bula cura' lo bandona e fraccion di UP y declara nan mes independiente. Esnan cu a vota contra e mocion, tabata miembronan di e partido UP,  Johan Leonard, Theo Heyliger, Tamara Leonard, Lloyd Richardson y Franklin Meyers y e candidatoan independiente Cornelius de Weever y Leona Marlin-Romeo.