Tres sospechoso deteni pa disturbio a recobra nan libertad

ORANJESTAD – Tur tres sospechoso cu tabata sera na KIA ainda pa e disturbionan di augustus dilanti parlamento, awe mainta a recobra nan libertad. Awe mainta vocero di ministerio publico Ann Angela a confirma esaki pa NoticiaCla.com. Fiscal awe mainta a dicidi cu e investigacion riba e sospechosonan J.G., F.S.G, y R.G. vd B. no tabata rekeri nan detencion mas. Como tal fiscal mes a dicidi cu nan mag bay cas. E decision con husticia lo sigui cu nan, lo tin cu wordo tuma ainda. Nan ta sigui como sospechoso ainda si te ora cu nan caso bin dilanti.

PROLONGA SIMAN PASA

E tres detenidonan sospecha di ta participe den e disturbio dilanti parlamento dia 27 di augustus, siman pasa ainda a keda prolonga cu 30 dia. Huez comisario a prolonga e detencion di cada un di e tres personanan aki cu no menos cu 30 dia mas dialuna siman pasa. Esey a nifica cu pa e proximo luna, -si nada nobo no lo a sosode of bin dilanti-, nan lo a keda sera na KIA pendiente e investigacion.

MAS DETENCION

Mas tempran Angela a mustra na NoticiaCla.com cu si resulta for di e imagennan (tuma di e disturbionan di 27 di augustus 2015 na parlamento) cu mas investigacion ta necesario, anto lo bin mas investigacion. “E caso ta sigui den investigacion di tur manera”, vocero di ministerio publico Ann Angela a sigura NoticiaCla.com.

IMAGENAN

E imagennan di cual Angela a referi na dje, ainda ta wordo investiga y analisa segun Angela, y si for di e imagennan aki y-of for di e investigacion, resulta cu tin mas sospechoso, anto lo actua riba esey tambe. Segun Angela, esaki tin di haber met name cu e rumornan tocante un "schutter", esta un tirado. Tur esey mester tin mas claridad ariba pa diabierna awor. Te aworaki tin tres persona deteni ainda (na KIA) cu ta J.G, Rvd B, y F.S.G. E dosnan cu a haya nan libertad (por lo pronto) ta I.I.L y J. M.

MOTIVACION PA PROLONGACION

Motivacion di fiscal pa pidi pa prolongacion, ta pasobra e ta ‘relaciona cu e seriedad di e hechonan di cual nan ta wordo sospecha y cu mester mas investigacion”. Riba esaki e huez comisario lo dicidi dialuna awor.

E SUSESO

Despues di e disturbionan diahuebs dia 27 di augustus, polis a detene 12 persona inicialmente, y despues a laga 7 bay. A keda 3 persona cu si no a recobra nan libertad y ainda ta sera. Nan a haya dos dia di inverzekeringstelling y 8 di prolongacion di esey. Awe, tur ta den libertad atrobe, aunke temporal.