RIU Antillas un aña despues di su apertura tin ocupacion di 85%

ORANJESTAD – Un aña despues di su apertura como un propiedad RIU, e hotel antes Westin y awor RIU Antillas, a haya su lugar den comunidad y mercado. Cu un ocupacion di 80%, e ta na e nivel cu RIU ta conoci pe y como tal e operadornan ta contento. Un aña despues, RIU a habri porta pa prensa pa repasa e propiedad y mustra con e hotel a adapta su mes despues di e aña aki.

CAMBIONAN DEN HOTEL

Pa e occasion aki, e director regional di operacion pa Aruba, Daniele Camponovo mes tabata presente pa presenta e ‘producto hotelero’ mas nobo di e cadena Spaño cu prensa. Camponovo a splica NoticiaCla.com cu e renobacion di e hotel, ora cu nan a cumpr'e enberdad tabata limita. A logra haci e cambionan structural mas obvio, manera e lobby, areanan publico y awor ta keda solamente pa e renobacion di e cambernan.

REMODELACION CAMBERNAN

E intencion ta pa prome cu fin di december, of prome cu pasco di e aña aki, cambia tur e pisonan di e cambernan, esta kita entre otro e tapijt di e cambernan y pone algo nobo. E ta un vloer moderno estilo palo cu ta mucho mas sano y no ta causa e holor di humedad fastioso ora cu tin algo muha. Mientras cu nan lo kier mira e bañonan tambe cambia, aki tres aña nan ta programa pa haci tal. Pero pa awor, e loke ta haci ta suficiente y nan ta satisfecho cu esey. “Awor nos ta traha trankilo” Camponovo a bisa.

HOTEL PA ADULTO

Loke a resulta hopi positivo, segun e gerente di benta di e hotel, esta Shari Sield, ta e concepto di hotel ‘pa adulto’. Esaki ta nifica cu e huespednan ta solamente adulto, pues no ta permiti mucha den e hotel. “E ta un concepto nobo cu nos ta purbando den e cadena RIU, den Caribe” Sield a bisa. Y e huespednan tabata hopi contento. Te cu awor tur cos ta bon. “E ta un concepto super trendy, cu hopi mericano gusta. Hasta e latinonan ta gusta esaki”.

OCUPACION HALTO

Na comienso tabata poco dificultoso pa logra e mercado, pero despues di 4 luna di trabou duro, e frutanan a duna resultado y e hotel ta conociendo un ocupacion di 85% cu ta loke RIU ta custumbra di dje. Pa e temporada di invierno, nan ta premira un ocupacion di 95% y mas halto cu sigur ta algo positivo pa e hotel.