Blanco: Problemanan di RIU (Palace) ta di pasado

ORANJESTAD – Cosnan ta parse di a normalisa na RIU hotel. Aunke e problemanan laboral cu a surgi algun tempo pasa, tabata basa na e hotel ruman esta RIU Palace, gerente di e hotel ruman RIU Antillas esta Juan Blanco, ta mustra NoticiaCla.com cu cos ta bastante den ‘harmonia’. ‘No tin problema obvio. Tin hopi trabou pa wordo haci” Blanco ta bisa NoticiaCla.com.

SITUACION A MEHORA

Algun tempo despues cu e hotel a pasa den momentonan tenso y fastioso, a habri porta pa prensa diaranson mainta pa sera conoci cu e ruman mas nobo, un aña di su apertura como RIU Antillas. Y aki a probecha e oportunidad pa toca e tema delicado. Tur di e 384 trahadonan cu ta traha aki ta compañeros. Tur loke a pasa ta pa pasado. Totalmente” Blanco ta sigura NoticiaCla.com. E mes tin 4 luna riba e isla y ta masha satisfecho con su coleganan ta andando cu e propiedad. “E numbernan ta papia pa nan mes”, Blanco ta bisa. Varios luna sin problema. Tin promocion interno, proceso di evaluacion, desaroyo. “Mas cu nada, nan ta rectifica nan conducta y no ta cancela. Tur hende merece un di dos oportunidad, y e derecho di ekiboca su mes. Tur ta fantasma di pasado y importante ta e presente awor pa loke ta e asunto di e hotel ruman."

MOMENTONAN TENSO

E hotel en cuestion, esta RIU Palace algun luna pasa no a pasa den su miho momentonan y a sufri basta pa loke ta e situacion laboral. Welga, problema cu referendum y casonan den corte a tipifica e forma con e hotel tabata pasa su siman y lunanan. Pero tur esey awor ta parse di ta tras di lomba. De hecho, recientemente e hotel a gana un otro premio cotiza Apple, cu ta un reconocemento pa e trahadonan cu ta wordo premia pa e bishitantenan di Apple Vacations, un di e agencianan mas grandi turistico mericano. Den un relato recien, NoticiaCla.com a raporta netamente riba e topico ey, unda cu ta parse cu RIU su problemanan no a stroba e trahadonan di resalta den servicio y cu e hotel ta sigui luci di un forma positivo.