Nos aeropuerto premia como pa promocion di safety mundialmente

ORANJESTAD – Aeropuerto di Aruba a wordo reconoci durante e Asamblea di ACI World combina cu Latino America y Caribe na Panama pa su contribucion na e “Airports in Excellence Program” (APEX) y pa ta un aeropuerto ehemplar mundialmente den e area di promocion di safety y implementacion di e mihor practicanan.

E PREMIO

E premio a wordo otorga na Aeropuerto di Aruba su COO Sr. Jurgen Benschop door di ACI World su General Manager Sra. Angela Gittens dilanti di mas cu 620 aeropuerto participante cu ta representa tur aeropuerto rond mundo, incluyendo e ultimo COO di Schiphol Group Sr. Ad Rutten.

Aeropuerto di Aruba ta participa activamente den e comisionnan di ACI y sa asisti ACI ora di haci evaluacionnan di APEX na diferente aeropuerto den nos region pa yuda mehora safety.

REACCION BENSCHOP

“Pa un aeropuerto asina chikito wordo premia entre aeropuertonan grandi rond di mundo ta un logro hopi grandi. Nos mester ta hopi orguyoso di nos esfuersonan pa promove safety na Aeropuerto di Aruba. E reconocimento aki ta reenforsa nos vision y ta asegura nos cu nos ta riba e bon caminda pa logra un cultura di safety dinamico. Awo nos ta wordo considera lider den promocion di safety. Esaki no ta algo pa wordo tuma suave, pero como motivacion pa mantene nos posicion entre esunnan grandi!” asina Benschop a bisa.