Hopi hende na Aruba engaña pa ‘mensahe’ di Facebook

ORANJESTAD - Hopi persona na Aruba cu ta uza Facebook diariamente, inocente of no, a cay den e engaño (hoax) cu tin e dianan aki riba e red social. E accion ta Facebook lo ta pidiendo pa e usuario pone cierto informacion riba su muraya (wall) personal pa asina evita cu Facebook ta abusa di e ‘privacidad’ di e usuario, y mas importante evita cu Facebook cuminsa cobra usuario pa nan servicio. Hopi hende a cay den e wega/trampa aki y a pone esaki keriendo cu enberdad su informacion lo wordo ‘protegi’.

HISTORIA TA RIPITI

No ta prome biaha cu esaki a sosode riba Facebook. Y awe un biaha mas, Facebook mes, hunto cu varios agencia di noticia a dicidi pa clarifica esaki. Facebook mes a mustra cu nan no tin necesidad pa haci tal, y e ‘posting’ di un mensahe semehante, no ta proteha ningun hende pa Facebook haci tal. De hecho, nan ta mustra cu for di ora cu un persona opta pa bira ‘usuario’ di e red social aki, e ta compromete su mes na inicio, door di aproba y ‘bay di acuerdo’ cu cierto condicionnan, den cual ta stipula perfectamente kico por y no por y con e parti di privacidad ta hinca den otro. “Como tal, nos no mester tin ningun posting riba un muraya di un usuario pa nan proteccion’, Facebook a sigui bisa.

VULNERABILIDAD

Esaki un biaha mas ta ilustra e vulnerabilidad di un persona y con lihe e ta kere den un of otro ‘storia’ y ta bay su tras, sin averigua si enberdad e asunto ta algo cu tin credibilidad of no. Awendia, ta masha facil pa averigua kico ta ‘real’ y kico no. Y hopi biaha e tin di haber cu ‘logica’ unda cu un persona por saca afo si enberdad e accion solicita, ta uno cu tin sentido y cu e ta logico pa wordo poni. Den e caso aki, no ta trata di un virus menos mal, pero pa e mesun ‘suerte’, e persona lo por a cai den un trampa cu por conduci den un virus cu por haci daño na e computer di e persona.