Aruparking: Dispuesto pa traha hunto cu comercio pa atrae cliente

ORANJESTAD – Aruparking ta dispuesto pa traha hunto cu comercio pa atrae cliente yega den centro di ciudad. Asina e compania cu ta maneha e operacion completo di parkeermeter, ta reacciona riba e comentario di Camara di Comercio (KvK) riba e topico aki. Den curso di dia, KvK a mustra nan desaprobacion pa e forma con e proceso a bay di introduccion di parkeermeter, mientras cu nan ta bisa si cu nan no ta contra e idea di parkeermeter. Mesora, e compania Aruparking a reacciona bisando cu nan ta contento cu KvK ta reconoce e aspecto positivo cu e proyecto di parkeermeters ta crea mas espacio pa clientenan staciona nan vehiculonan mas cerca di e tiendanan. Segun e compania, nan no por keda sin menciona cu e regulacion di stacionamento den nos centro di ciudad a mehora, unda practicamente no ta mira autonan mal staciona mas.

INTRODUCCION

E compania ta sigui na splica nan introducion y nan logronan consecuentemente. Mes momento ta defende nan proceso uno pa uno tambe. “Introduccion di Parkeermeters a bay gradualmente. A opta pa haci esaki pa publico cera conoci cu e sistema nobo aki. Por menciona te hasta cu a scoge pa hiba un introduccion flexibel educando asina e automobilistanan di kico ta permisibel y kico no. Por medio di un sticker tabata avisa e autonan mal staciona. Un cantidad minimo di autonan cu despues di haya un sticker y no a reacciona, a wordo getakel ta pa motibo cu nan a staciona di tal forma cu a trece trafico directamente na peliger of na e sitionan cu absolutamente no ta permiti. Por sinti cu mas y mas automobilistanan ta custumbrando cu e sistema y awor ta haciendo miho uzo di tanto e parkeervaknan como e parkeermeters” e comunicado di e compania ta sigui bisa.

RESISTENCIA

E compania a sigui mustra cu enberdad e ta reconoce cierto resistencia manera cu KvK a ilustra den nan comentario. “ Aruparking ta consciente cu introduccion di un sistema nobo di cual antes no mester a paga p'e por spera resistencia. Ta kere cu mescos cu a pasa den exterior, despues di algun tempo esaki lo bira algo normal y hasta e comerciante nan lo por goza di mas clientenan den centro di nos ciudad. Despues di e revitalisacion di nos centro di ciudad hopi ta e clientenan cu a tuma como custumber di bay haci nan compras na otro sitionan pafo di nos centro di ciudad unda ta mas facil pa staciona nan vehiculo. Awor nos ta cla pa yama nan bon bini bek den Caya Betico Croes unda clientenan awor lo por haya un luga di parkeer mucho mas facil y casi dilanti di nan tiendanan preferi pa haci nan compras”.

PARKEERGARAGES

Unda cu KvK ta papia di falta di parkeergarages, cu ta un di e problemanan cu nan ta sinti cu tin cu introduccion di e proyecto, Aruparking ta admiti cu aki tambe Kvk tin un punto. “Enberdad tin riba plan pa construccion di algun parkeergarages. Mester menciona cu si a scoge pa introduci parkeergarages prome parkeermeters, esaki lo tin como consecuencia cu automobilista nan lo no haci uzo di parkeergarages mientras cu por staciona gratis den henter e area di nos centro di ciudad”.

TARIFA REDUCI

Unda cu KvK ta mustra nan desaprobacion pa cu e tarifanan ‘halto’, e compania ta defende nan maneho riba e punto aki tambe, y ta referi na e reduccion recien di e compania riba e punto aki. “Recientemente Aruparking a anuncia te hasta reduccion den e tarifanan. Esaki danki na e demanda halto di e stacionamento regla pa esunnan cu ta labora den centro. A percura pa un reduccion di 20 porciento unda cu awor e tarifa mensual pa Werk Parkeervergunning ta 60 florin. Scuchando e peticionnan di e clientenan di Aruparking, a dicidi di introduci tambe tarifanan mas atractivo manera ta 1 florin pa 30 minuut y tambe 2 florin pa 1 ora y mei. A tambe pa personal di siguridad na e puntonan mas strategico di 7 or di mainta te cu 12 or di marduga y tambe a percura pa mas iluminacion brindando un sentido di trankilidad pa esunnan cu ta staciona nan auto den e areanan cu mas risico”.

COMPANIA NOBO E INOVATIVO

E aspecto di tin cu cana cu placa pa por paga, tambe e compania a atende mesora. “Aruparking ta un compania hopi inovativo. Mientrastanto ya caba tin un opcion di Aruparking Smartcard unda ta facilita esunnan cu no tin custumber di tin placa den forma di moneda na tur momento. Tambe ta asina cu na momento di recarga e recibo por haci esaki na cualkier parkeermeter, uzando e number riba e recibo pa añadi tempo. Dentro di poco lo por spera servicionan adicional manera machinnan adicional den Caya Betico Croes, posibilidad pa uzo di bo propio tarheta di credito of maestro y tambe Aruparking ta trahando riba un App pa telefon cellular. Cu esaki lo ta posibel pa ubica un parkeermeter mas facil, lo por cumpra of añadi tempo na bo espacio di parkeo promedio di bo telefon sinta den un restaurant of durante bo compras”.

TRAHA HUNTO

Y na final, e compania ta sigura cu nan ta dispuesto pa traha hunto cu comercio, manera cu KvK a sugeri, pa asina tin un miho proceso riba e tereno aki. “Ta sigur cu Aruparking cu e comerciantenan di Caya Betico Croes, lo por traha conhuntamente pa sigui brinda e miho servicio na tur e clientenan di nos centro di ciudad facilitadonan e espacio necesario pa nan por haci nan compras den tur trankilidad” e compania ta finalisa bisando den nan comunicado.