KPA: A reintroduci e "Flex Team" di polis

ORANJESTAD -  "E ta un ekipo special di Polis cu nos a introduci algun aña pasa ora nos a confronta problema cu hobennan riba caya. Pero cu e acontecimientonan di e ultimo lunanan, mi a tuma e decision pa reintroduci e grupo aki atrobe", asina mr. Dolfi Richardson, Alto Comisario di Cuerpo Policial Aruba a anuncia. Cu esaki Mando Policial ta spera di por contraresta e problemanan constante cu ta topando cune cu un grupo specifico di hobennan baldadi y problematico. E "Flex Team" di Polis ta consisti di algun Polis clave, selecta un pa un, cu un meta y mision specifico pa cumpli cune. Nan ta move tur rond di nos isla, pero specificamente na luganan publico frecuenta pa hopi hende. Tambe nan ta bishita barionan caminda tin molester cu hobennan problematico pa "ruim op de boel" y reestablece ordo riba caya. Mayoria di e Polisnan den e team tin bon experencia y conocemento di e trabou policial riba caya. Mando Policial ta reuni cu e ekipo aki di polis semanalmente y por constata cu nan ta comprometi cu e trabou y cu e causa. Nan ta traha den cooperacion estrecho cu otro teamnan manera K9, cu e ekipo di inteligencia y e ekipo di observacion. Di e forma aki nan por completa nan vision, esta pa trece e trankilidad necesario bek riba caya.