Aqua48: Bebe awa pa un bon causa y un mihor medio ambiente

ORANJESTAD - Aqua48 (lesa: Aqua ‘for Aid’) ta un proyecto nobo pa awa di bebe den establecimentonan horeca na Aruba. Aqua48 ta promove bebemento di awa di cranchi y asina ta contribui na medio ambiente. Uzo di boternan di plastic y glas ta ocasiona hopi daño na medio ambiente y emision di CO2 innecesario. Hopi boter ta desaparece den naturalesa y finalmente den awa di laman. Ademas, Aqua48 ta ofrece ayudo y sosten na causanan humanitario na Aruba, principalmente na nos grandinan, personanan cu un limitacion fisico of mental, muchanan y huerfanonan pero tambe na animalnan den necesidad. Durante e conferencia di prensa di Aqua48 diamars ultimo den restaurant ArubaVille, Edwin Hekman di Aqua48 a presenta e proyecto den presencia di sponsor WEB Aruba y representantenan di CEDE Aruba y establecimentonan participante.

SPONSOR

WEB Aruba ta sponsor di e proyecto di awa potabel Aqua48. “Cu esaki nos ta contribui na medio ambiente y na e cuido di habitantenan di Aruba”, Luis Oduber director general interino di WEB ta splica. “Na mes momento como WEB nos kier duna un señal positivo y motiva tur habitante y turista di Aruba”. Manera conoci, medio ambiente y sostenibilidad pa e proximo añanan ta e punto di enfoke di e maneho gobierno. Cu e iniciativa aki WEB ta asumi un rol di liderazgo.

GLAS SPECIAL PRIJS SPECIAL

Ta sirbi awa potabel Aqua48 den un glas special, pa un prijs di consumidor minimo di 1 florin. Un parti di e suma ta bay como donacion pa personanan y animalnan den necesidad na Aruba. CEDE Aruba lo conseha cua proyecto lo por bini na remarca pa un donacion. Un comision di asignacion cual ta consisti di un representante di WEB, uno di CEDE Aruba y uno di e establecimentonan participante ta dicidi riba e donacionnan. Como prome bon causa a scohe pa Stichting Algemene Bejaardenzorg Aruba (SABA). Nan lo ricibi un donacion pa mobilario nobo pa optimalisa bibienda y suavisa e consecuencianan di demencia pa nos grandinan. E glas special di Aqua48 tin e logo di WEB ariba dje. “WEB ta un partner importante pa nos”, segun Edwin Hekman di Aqua48. “No solamente pa motibo di e sponsoring, pero tambe pa suministra ‘nos’ awa di primera calidad. Calidad di awa di cranchi di Aruba ta esun mihor di nos region. Y e awa ta dushi tambe!”

DESAROYO DI PROYECTO

E organisacion di Aqua48 ta traha riba e proyecto for di aña 2014. Entrante 1 di october Aqua48 ya ta obtenibel den mas cu 50 restaurant na Aruba. Hekman: “Nos no tin mucho tempo ta acerca puntonan di benta, pero e entusiasmo ta grandi. Casi tur doño di restaurant cu mi acerca ta hopi positivo pa cu Aqua48. Hopi di nan kier sponsor mas cu nos ta pidi. Nan no tin cu inverti nada. Nos ta suministra e glasnan y articulonan di promocion completamente gratis.” Doñonan di bar, restaurant y hotelnan por inscribi pa participa via www.aqua48.com of por yama Edwin Hekman, tel. 592-2506. Aqua48 tambe tin pakete special pa companianan cu no ta cay den e categoria horeca, pero cu toch kier contribui. Pa mas informacion: www.aqua48.com