Rey Willem Alexander a lobby duro pa asiento Nacionan Uni

ORANJESTAD/NEW YORK- Rey Willem Alexander dialuna durante su discurso na Nacionan Uni a haci tur posibel pa mustra cu Hulanda merece e asiento no permantente den Conseho di Seguridad di Nacionan Uni otro aña. Deliñando tur e beneficionan cu Hulanda ta ofrece y e posicion perfecto cu e pais tin, hunto cu e islanan den Caribe, Rey Willem Alexander a presenta Hulanda pa mundo henter dialuna merdia. Na inicio di su discurso  Rey Willem-Alexander a splica cu Reino Hulandes ta consisti di 4 pais autonomo. Nan ta Hulanda, Aruba, Corsou y Sint Maarten. Prome Minister di Aruba Mike Eman, kende un dia prome a dirigi palabra den e di 70 Asamblea General di Nacionnan Uni, a duna un splicacion similar pasobra loke pa nos aki banda ta mustra logico, pa otronan ta algo ilogico. “Reino Hulandes tin su raiznan den tanto Europa como den Caribe”, Rey a bisa.

DESCRIBIENDO E SITUACION

“Den e 70 añanan di su existencia Nacionnan Uni, mundo a experencia cosnan grandi y varios cambio di poder. Avancenan tecnologico a cambia nos bida diario mas lihe y mas dramatico cu nunca antes. Nacionnan Uni a supera tur esaki”. E Rey a bisa cu tabatin conflictonan amargo, interesnan aheno y tragedianan humano cu tabata tuma lugar y ainda ta tumando lugar. “Na e momentonan aki mes bida di hopi hende ta na peliger pa motibo di opresion, miedo y necesidadnan. Asina mes Nacionnan Uni ta sigui existi”. Den su bunita discurso Su Mahestad a bisa cu Nacionnan Uni cu ta e plataforma legitimo unda paisnan ta bin hunto pa busca solucion, ni con grandi nan diferencianan ta. Pero Nacionnan Uni ta mas cu simplemente un plataforma. “E ta un organisacion di cual su actividnan ta forma y yuda mundo progresa.” El a menciona varios metanan di Nacionnan Uni cu a wordo logra, manera acceso na awa potabel den hopi lugar na mundo y enfermedadnan cu a bira menos.

TRAHANDO DURO PA ASIENTO

Su Mahestad Rey Willem-Alexander durante su discurso a ‘lobby’ pa Hulanda cu ta trahando duro logra haya un asiento den e Conseho di Seguridad di Nacionnan Uni. Ya pa algun tempo caba Hulanda ta purba di conkista e asiento aki cu na 2017 ta bira acesibel. Ocupando e asiento aki Hulanda por participa y dicidi encuanto misionnan di paz di Nacionnan Uni y tambe brinda proteccion na esnan cu ta biba den paisnan unda tin guera y conflicto. Hulanda a yega di ocupa e asiento aki cu no ta permanente na 5 ocasion. E ultimo biaha tabata na 1999. Rey Willem-Alexander a bisa su audiencia cu Hulanda cu hopi pasion lo defende e interesnan di e miembronan di Nacionnan Uni. El a remarca tambe cu e Conseho di Seguridad mester wordo cambia si tene na cuenta cu paisnan Africano no ta bon representa den e Conseho aki. Un otro punto cu e Rey a toca den su discurso ta e disaster cu e avion MH17. E ta haya cu esnan cu ta responsabel pa e disaster y esnan cu a comete e atrocidad aki mester wordo busca y condena, pasobra cu ‘Violencia nunca mag di domina’. NOTA: Mira e discurso di Rey Willem Alexander completo aki.