Hugo Carvajal liber, cu inmunidad pero persona non grata

ORANJESTAD – Ex general Hugo “El Pollo” Carvajal ta un homber liber diadomingo anochi, pero mes momento un persona non grata pa pais Aruba. Esey ta nifica cu e recobra su libertad pero tin cu bandona nos isla mesora. Esey ta e declaracion oficial di parti di autoridad di Aruba durante un conferencia di prensa di ultimo ora. A splica cu ta for di Hulanda e informacion a yega diadomingo (lesa minister di relacionnan exterior Frans Timmermans) cu a resulta cu toch Carvajal tabata goza di un inmunidad politico, y cu consecuentemente su detencion ta bira ilegal. Problema tabata sinembargo, cu e informacion aki no tabata disponibel na Aruba prome segun Procurador General Peter Blanken a confirma na NoticiaCla.

Mientras cu Blanken ta compronde cu Merca lo ta decepciona cu e noticia aki (cu tin cu laga un persona asina importante pa Merca bay), tin cu compronde tambe cu tin tratado, y cu tin un situacion cu no por a haci otro. Mientras cu mundo por mira Aruba awor como un ‘joke’, Procurador General Blanken a sigura NoticiaCla cu e no ta considera cu Aruba a comete un blunder den e caso aki. “Nos a simplemente actua riba informacion cu nos tabatin y a haya awe for di Hulanda” Blanken a sigura NoticiaCla.

E pregunta cu tambe a surgi mesora, ta con bin ta laga un persona liber, acepte como un diplomatico cu inmunidad, pero mes momento ta declare non grata, y ta sake for di Aruba e mesun dia. “Esey mi no por bisabo” minister di husticia Arthur Dowers a contesta NoticiaCla. Esey ta pasobra e ta un decision cu a bin for di direccion di relacionnan exterior di Hulanda y ta for di Aruba su man. Pues ‘bruto bisa’, Aruba no tabatin ‘nada di haci cu e nombracion como persona non grata’ di sr Carvajal y mas ainda, no sa a base di ki criteria, Hulanda a declara e persona aki non grata. Cu e noticia aki ta daña relacionnan entre Aruba y Merca, no ta conoci, y tampoco no ta conoci segun minister Dowers, si e ta daña relacion entre Aruba y Venezuela, ora cu bira conoci cu Reino Hulandes (Aruba ) ta duna Carvajal libertad, pero mes momento declara un diplomatico venezolano persona non grata.

 Y finalmente, e rumor cu propio presidente di Venezuela lo tabata na caminda pa Aruba, no por a wordo confirma pa minister di husticia, Arthur Dowers. “Mi no ta na altura di esaki”. Riba rednan social, tanto local como internacional, por a lesa mesora di reaccionnan tanto positivo como negativo riba e asunto aki, unda cu ta mira Aruba como un joke, y tambe Hulanda su relacion cu Merca como uno cu lo por a keda afecta. Hopi no tabata compronde e embergadura di e desisionnan di diadomingo, y tampoco no tabata compronde esaki. Como tal e comentarionan tabata hopi, diferente y mas cu tur, den for ma di pregunta, di con diabierna un persona supuestamente asina peligroso, diripiente dos dia despues ta haya un status di diplomatico cu inmunidad, haya su libertad, pero ta wordo deporta.