Escritor di ‘Dubbelspel’ Frank Martinus Arion a fayece

WILLEMSTAD – E escritor Antiano/hulandes Frank Martinus Arion (78) a fayece. E tabata malo pa un tempo caba. Arion tabata skirbi buki tanto na hulandes como na papiamento. Su buki mas popular sigur ta ‘Dubbelspel’, cu ta e roman cu cual e la debuta su carera di escritor na 1973.

DUBBELSPEL

E buki a wordo filma tambe, y na 2006 tabata e enfoke di e campaña ‘Nederland leest’. Na scolnan den Reino Hulandes, e ta un di e bukinan obligatorio pa lesa pa examen. E tema di e buki aki basa riba e bida na Corsou. Gana y perde den e buki aki ta cuestion di bida y morto, simbolisa pa un wega di domino cu e personahenan den e buki ta hunga.

BIDA DI ARION

Arion tabata considera como e ‘nestor’ di literatura na Corsou, segun coresponsal pa NOS, Dick Drayer. Politicamente e tabata hopi activo, y tabata sostene e lucha pa independencia. Na 2008 e la debolbe su condecoracion real, como protesta contra e proceso di decolonisacion hulandes. Segun Arion, Hulanda tabata mete mucho cu Corsou. foto cortesia werkgroepcaraibischeletteren.nl