Alerta di calor emiti atrobe pa Aruba

ORANJESTAD – Un biaha mas Aruba ta habri siman cu un advertencia di calor, en efecto atrobe pa 2 dia debi na e situacion di tempo, segun servicio meteorologico di Aruba. E ciudadnan afecta ta pa Oranjestad y San Nicolas. Esaki ta nifica cu temperatura halto riba e proximo dos dianan lo yega 35 grado celsius y mas halto. Cu un humedad di 70% y menos biento, esaki lo sinti como si fuera cu e tempo ta 38 grado celsius. E parti pio di dia lo ta entre 1’or y 3’or di merdia.

WEEKEND

For di fin di siman por a sinti e calor aki caba, aunke cu servicio meteorologico no a emiti e alerta ainda. Specificamente diadomingo e temperatura a yega 34 grado y tabata sinti te hasta te 40 grado celsius. Varios posting riba e.o. Facebook tabata confirma e sentimento di comunidad di e calor insoportabel.

ADVERTENCIA

Pa loke ta e advertencia, esaki ta nifica cu un temporada di temperaturanan halto y calor ta wordo anticipa. E combinacion di temperatura halto y humedad halto por causa un situacion cu malesa di calor por ta posibel. Bebe suficiente liquido. Mescos cu biaha pasa, ta pidi pa keda si ta posibel den camber cu aire condiciona. Keda afo fe solo si ta posibel y check riba miembro di famia y bisiñanan si ta necesario. Tambe pone atencion riba bestianan di cas pa wak si nan tin suficiente awa limpi y ta den sombra constante. Tambe ta bon pa muha nan un poco pa asina nan tin alivio di e calor.