Bermudez: Reunion cu CAFT constructivo y ameno

ORANJESTAD – Segun minister di finanzas Angel Bermudez, e prome reunion oficial cu College Aruba Financieel Toezicht tabata constructivo y ameno. Segun gobierno, den un comunicado, nan a confirma cu diabierna ultimo a tuma luga e prome bishita oficial di e colegio di supervision financiero CAft na Aruba, unda cu nan a bishita diferente autoridad y instancianan, entre otro Minister di Finanzas.

TOPICO DISCUTI

Durante e encuentro aki a intercambia informacion di nos finanzas publico, como tambe a delibera riba e ehecucion di e presupuesto 2015 y e preparacionnan di e presupuesto pa 2016. Otro punto di agenda importante cu tambe a papia riba dje tabata e diferente terenonan den cual Hulanda lo por duna asistencia pa reenforsa e funcionamento financiero di nos pais.

LOGRA MIHO MANEHO Y CONTROL PRESUPUESTO

“Den algun ocasion mi a toca e tema aki caba paso e ta importante pa nos por cuminsa traha den actualidad, produci rapport y cifra regularmente lo mas pronto posibel, pa asina logra un miho maneho y control riba e ehecucion di nos presupuesto entre otro”, asina Minister Bermudez a indica despues di e reunion cu CAft diabierna mainta.