CAFT: Ta confia gobierno pero lo vigil’e criticamente p'e cumpli

ORANJESTAD – Pa por tin un bon relacion di trabou cu gobierno, mester tin confiansa. “Sin confiansa (nos trabou) no ta bay logra”. Na palabra, presidente di College Aruba Financieel Toezicht (CAFT) Age Bakker na NoticiaCla.com durante un conferencia di prensa recien. E pregunta a surgi cu debi cu constantemente Aruba ta wordo ‘tilda’ di ta bin cu yen di plan y medida pa cumpli cu reduccion di deficit, pero cu nan no ta cumpli finalmente. Den e caso aki a puntra ki confiansa CAFT tin, cu awor si gobierno lo cumpli cu su palabracionnan.

CONFIANSA CU GOBIERNO

Segun Bakker, CAFT tin confiansa cu gobierno lo traha duro. “Tin medidanan di consolidacion concreto stipula, y tin un trayecto concreto presupuestario na caminda pa e balansa presupuestario”, Bakker a sigui bisa. Loke cu CAFT lo haci si, -y cu por spera esey sigur di CAFT-, ta cu nan lo sigui vigila esaki di un forma hopi critico, y lo sigui haci pregunta skerpi. “P'esey mi a bisa tambe cu tin biaha nos tono ta porta (poco) ‘nobo’”. Aki e ta referi cu porta Aruba no ta custumbra cu e forma di expresa di CAFT, y e tono por zona poco ‘pisa’.

TONO CRITICO DI CAFT

“Nos tin cu por bisa si kico nos ta pensa, y kico ta nos pensamento. Nos no a wordo contrata pa papia bunita (y haci como si fuera cu no tin nada malo pasando).” Bakker continua bisando. Esey por nifica pues de bez en cuando, cu cosnan lo wordo bisa ‘di un forma hopi cla’ ora cu mester. Pero esey por den un comunidad adulto transparente, segun Bakker. Finalmente ta keda na gobierno si nan ta actua riba esey. “Tin biaha nos tin e postura di ‘ver para creer’. A duna un ehempel, den forma di e ‘tax compliance’, osea e reforma fiscal. Gobierno a mustra cu e plan cu nan tin pa cu esaki, cu e lo genera basta entrada den caha di gobierno. Algo cu CAFT ta para completamente su tras, pero no mester canta gloria prome cu ta tempo pa haci tal. Esaki den sentido cu e plan di gobierno ta zona ambicioso y cu kier wel di logra genera hopi entrada den un solo tiro. Esey sinembargo,- segun CAFT-, no kiermen cu gobierno ta bay logra esey tambe. “Nos sa con fastioso esaki por ta. P'esey, no calcula entrada te ora cu realmente bo a logra mehora e sistema fiscal”. Pues, en corto, CAFT tin confiansa riba gobierno, pero nan lo keda vigila gobierno di un forma critico, pa sigura cu enberdad gobierno ta cumpli cu su promesanan.