Bakker: Aumento entrada pa 2016 di presupuesto no ta realistico

ORANJESTAD – E situacion financiero di Aruba te awor ta ‘so far, so good’. Pero gobierno mester mantene su presupuesto y su intencionnan mas realistico si. Asina e presidente di College Aruba Financieel Toezicht (CAFT), Age Bakker a sigura NoticiaCla.com recientemente durante nan prome encuentro cu prensa. Despues di a pasa henter un dia di combersacion cu gobierno di Aruba diabierna, CAFT a haya un ‘diferente’ opinion di e situacion cu nan a conseha recientemente. ‘Gobierno tin un plan (pa drecha e situacion financiero) y ta poni pa ehecuta esaki’, Bakker a bisa. Loke a hala atencion ta e hecho cu Bakker a bisa awor cu,-contrario na su declaracionnan reciente-, CAFT no ta pidi awor pa medida adicional.

TRANKILIDAD PA GOBIERNO

Un mensahe cu Bakker a manda pa comunidad, ta cu nan ta compronde cu comunidad ta preocupa cu e situacion financiero. Sigur riba e medidanan cu ta poni pa wordo tuma etc. Loke cu CAFT kier logra segun Bakker, ta pa netamente haya e confiansa bek pa un presupuesto ordena. “Comunidad di Aruba tin derecho riba esaki”. Mientras cu e no kier a bai riba e contenido di e combersacion cu gobierno (minister di finanzas Angel Bermudez), Bakker a relata cu parti di e concepto di presupuesto cu nan a ricibi di gobierno pa 2016, ta premira un aumento di entrada fuerte di 6.5%. “Nos a bisa si, cu nos ta considera esaki hopi dificil pa logra y a avisa esaki pa reduci esaki”. Tin mas conseho, pero esaki ta e base di e conseho cu nan a manda pa gobierno.