Despues di 43 anja Southwest Airlines ta bula pa Aruba

ORANJESTAD - A dura 43 anja pero porfin diamars merdia, e prome avion di e compania aereo mericano Southwest a aterisa na Aruba. Aunke e ta e prome buelo di e compania, e no ta realmente un 'buelo nobo' ya cu e compania anterior Air Tran tin varios anja bulando pa Aruba caba. Ta anja pasa ora cu Southwest Airlines a cumpra Air  Tran, nan a haya derecho riba e avionnan y tambe e ruta aki y a probecha awor. A escohe Aruba pa ta nan prome destinacion internacional, y esaki ta loke a keda celebra diamars merdia cu un recepcion tur afo. Convertiendo parti di e sala di VIP den un beach, a purba duna un toke di Aruba na e ehecutivonan di e aerolinja, di loke Aruba ta realmente. Notable ausente tabata minister di Turismo Otmar Oduber cu pa motibo personal, no por a atende e ceremonia importante aki. Colega Paul Croes a tuma e honor pa ricibi e invitadonan special na nomber di gobierno. 

E vuelonan di Southwest lo ta for di Orlando, Atlanta y Baltimore y nan lo crea oportunidadnan grandi pa nos por diversifica nos mercado turistico na Merca mes teniendo na cuenta cu Southwest ta e aerolinea local di mas grandi y esun cu ta conta cu mas clientenan fiel. Teresa Laraba, Senior Vice President of Customers a bisa cu Southwest ta hopi entusiasma di por ta presente na Aruba, di por a bin nos isla den e promer vuelo internacional di e aerolinea y cu e vuelo inaugural ta mustra caba con exitoso e destinacion aki lo bay ta mirando cu den henter e avion tabatin solamente 2 asiento bashi. Hopi di nan cientenan A-list tabata den e avion cu ‘companion passes’cu nan ta gana dor di biaha asina hopi. Segun  Laraba, normalmente ora ta haci e vuelonan inaugural, mayoria di e pasaheronan ta personal di Southwest mes y no pasaheronan cu ta paga, pero e biaha aki tabata diferente, solamente 6 of 7 di e pasaheronan tabata empleadonan di Southwest. El a conta tambe con pasaheronan tabata acerca e trahadornan di e aerolinea pa gradicinan pa habri e destinacion Aruba, cual ta un otro indicacion di e exito cu e vuelonan aki lo bay tin. Southwest ta conta cu riba 100 miyon cliente anual y cu e vuelonan aki ta habri portanan pa Aruba contecta cu tur e lugarnan cu e aerolinea ta bula. “Awe ta solamente e inicio, e storia a caba di cuminsa y mi ta ansioso di wak con e siguiente capitulo ta desaroya”, Teresa Laraba a bisa.