Bakker: Colaboracion central cu prome bishita di CAFT na Aruba

ORANJESTAD – Colegio di supervision financiero di Aruba (CAft) a hasi su prome bishita oficial na Aruba awe despues cu e Ordenansa Nacional di supervision financiero provisional (LAtft) a drenta na vigor. E bishita tabata dirigi riba elaboracion practico di LAtft y ampliacion di e base di confiansa, segun presidente Age Bakker. Entretanto, poco tempo despues di ratificacion di Latft door di Parlamento di Aruba CAft a emiti reporte tocante e reportahe di ehecucion di 11 di september 2015, e proyecto di presupuesto 2016 y e cuenta anual di 2014. Y for di e conferencia di prensa despues, por nota cu e tono di Caft a cambia considerablemente, indicando cu cosnan por ta canando bon.

BISHITA

E Colegio a haci un bishita na Aruba diabierna dia 25 di september. Ey Colegio a papia cu Gobernador suplente, Ministro di Finansa, Conseho di Ministro y e Comision di Finansa di Parlamento di Aruba y ATIA.

UN BON COMIENSO

CAFT ta recorda cu parlamento di Aruba a aproba LAtft dia 27 di augustus 2015. Siguientemente Conseho di Ministro di Reino a bai di acuerdo cu LAtft y cu e miembronan pa CAft proponi. CAft ta consisti, ademas di presidente Age Bakker, proponi pa Reino Hulandes, di Robert Croes, proponi pa Aruba, y Sybilla Dekker, proponi pa Hulanda. Durante e bishita a discuti e cifranan di e prome semester y a elabora varios punto di accion procedente di LAtft mas aleu. E puntonan di accion aki ta referi entre otro na: palabracion tocante elaboracion concreto di e obligacion di informacion, e plazonan di reporte di diferente documento cu mester presenta, palabracion relaciona cu mehoramento di administracion financiero, palabracion relaciona cu contraemento di prestamo y fihamento di e sector colectivo.

REPORTAHE DI EHECUCION

Den e dictamen emiti recientemente tocante e reportahe di ehecucion di dia 11 di september CAft ta observa cu durante e prome semester realisacion di e presupuesto tabata na 48%, tanto pa banda di e recursonan como di e gastonan. E deficit di explotacion te cu juni 2015 tabata di AWG 80 miyon, casi 50% di loke tabata presupuesta pa henter aña. Cu esey ehecucion di e presupuesto ta parce di ta segun plan, pero emision di un reporte final ta fastioso, ya cu te aworaki ta imposibel pa haci un analisis di e temporada, y calidad di e administracion financiero ta laga di desea. P’esei ta importante pa tene un tiki prudencia ora di interpreta e cifranan agota aki. Implementacion di e medidanan di consolidacion ta mustra adelanto compara cu e prome cuartal di 2015, ma te ainda e ta cana atras segun plan, particularmente riba tereno di frenamento di e gastonan di personal. CAft ta recomenda pa haci e control di ehecucion di e medidanan di consolidacion ey mas rigido den e di dos semester di 2015. CAft ta spera di por mira e efectonan positivo di aumento di e tarifa di BAZV den e di tres cuartal di 2015.

PROYECTO DI PRESUPUESTO 2016

Dia 17 di september 2015 CAft a emiti su dictamen tocante e concepto di proyecto di presupuesto 2016 abrevia. Den e reporte a enfoca riba diferente topico importante. E recomendacionnan ta dirigi parcialmente riba tenemento di un control mas rigido riba, y fundamentacion di e adaptacionnan proponi, manera revision di e sistema fiscal y reduccion di e gastonan di personal. Banda di esey CAft ta di opinion cu e concepto di proyecto di presupuesto 2016 abrevia ta duna un idea di e propositonan pa 2016 na forma limita. E acoplamento di e maneho cu e previsionnan a largo plaso a base di cifra no ta suficientemente comprendibel; asina, por ehempel, no ta posibel pa haci un conexion entre, na un banda, e Nota di Punto di Atencion (Speer puntennota) y, na otro banda, e presupuesto. Mester fundamenta e medidanan proponi mas aleu, tanto cu proposicion di ley como cu splicacion a base di cifra. A base di e cifranan presenta CAft ta di opinion cu mester di mas adaptacion a fin di realisa e deficit di finanzas di 2,0% di e PIB pa 2016.