Plasterk: Ningun momento RvS ta referi na ‘instruccion’ pa Aruba

DEN HAAG – Den e conseho (di Raad van State), e instancia no ta haci un declaracion riba instruccionnan directo cu recientemente a wordo duna na gobernadornan di e paisnan den parti Caribe di Reino. Asina minister hulandes Ronald Plasterk a contesta Tweede Kamer ayera pa medio di un carta. Mes momento, segun Plasterk, gabinete no ta lesa den e conseho, un fayo di e instruccion na nomber di gobernador. Al contrario. E instruccion al respecto na gobernador tabatin explicitamente e caracter di un medida temporario” Plasterk ta sigui bisa. E mandatario asina ta mustra den un carta cu ningun momento Raad van State ta considera cu gobierno di Reino a haci algo malo den e caso di instruccion (aanwijzing) contra Aruba aña pasa.

MEDIDA

Plasterk ta sigui mustra cu e medida duna tabata ‘dirigi explicitamente pa haci un investigacion riba e confiabilidad di e presupuesto entrega na gobernador, pa evita cu e situacion financiero di Aruba bira aun mas pior, cu por causa mas consecuencia den comunidad, y cu por conduci na intervencion (di Hulanda) a base di articulo 43 di statuut. Plasterk ta basa su mes riba e posicion financiero di pais Aruba, cu segun rapportnan di IMF, Raad van Advies y cifranan di Aruba mes, tabata asina preocupante cu gobierno di Reino a haya necesario pa haci un investigacion riba e realidad di e presupuesto. Awor cu tin e comision di supervision financiero independiente di Aruba, esaki lo keda monitoria e situacion como un paso pa recuperacion di e situacion di finanzas publico (di pais Aruba). Lesa e carta completo aki.