FIOD ‘bishitando’ esnan cu no a declara inkomstenbelasting

ORANJESTAD – Na inicio di aña 2015, e team di investigacion fiscal di Departamento di Impuesto: ‘FIOD’ (Fiscale inlichtingen- en opsporingsteam) a cuminsa bishita e personanan na kendenan Departamento di Impuesto a otorga e formulario di declaracion di inkomstenbelasting di aña 2011 y 2012 y cu no a entrega esakinan bek.

CANTIDAD BISHITA

Te cu awor a bishita mas o menos 140 persona na cas. A otorga un di dos aanmaning y un duplicado di e formulario di declaracion di inkomstenbelasting 2011 y 2012 na 120 di e personanan aki. Alaves a saca 25 persona for di e registro di cliente debi cu mientrastanto e personanan aki a bandona Aruba. Di e cantidad di personanan bishita, alrededor di 70 persona a cumpli caba cu nan deber di haci declaracion pa cu e añanan 2011 y 2012. Tambe FIOT a traha process-verbaal pa mas o menos 35 persona cu deliberadamente no a haci declaracion di inkomstenbelasting. Consecuentemente Ministerio Publico di Aruba lo bay "dagvaard" o menos 25 persona como sospechoso pa nan aparece dilante hues.

CASTIGO

Di acuerdo cu e ley general di impuesto (ALB), si deliberadamente no entrega e formulario di declaracion cu Departamento di Impuesto a otorga, e cliente por haya castigo di prison te na un maximo di 4 aña y/of un boet di maximo Afl. 100.000,-. P'esey Departamento di Impuesto ta haci un apelacion na tur su clientenan pa semper percura pa entrega e declaracion di inkomstenbelasting – of di cualkier otro tipo di belasting – y asina evita consecuencia indesea.