CITGO 'precupa' con lihe por haya Arubianonan bek pa traha na Aruba

ORANJESTAD – E compania CITGO ta precupa con lihe por haya arubianonan den exterior bek pa traha na Aruba, si nan dicidi di tuma e refineria actual over. E mensahe ey nan a confirma na minister di labor Paul Croes y colega minister di energia Mike de Meza durante e bishita recien na Houston. Croes a compaña de Meza pa reunionnan cu ehecutivonan di CITGO na Houston, Texas. Un di e puntonan cu a wordo poni hopi cla riba mesa ta cu e mercado local di labor ta e prome cu mester haya trabao, de Meza a bisa. E mandatario ta agrega cu ehecutivonan di CITGO ta di acuerdo cu esaki. Esaki ta un punto cu lo wordo inclui den protocolnan relaciona na e establecimento di CITGO na Aruba cu compra di e refineria na Sero Colorado si e compra tuma luga de Meza a subraya.

HISTORIA LABORAL

Historicamente ta demostra cu si e hendenan di e pais mes wordo duna trabao e ta sali e compania menos costoso, pero tambe ta mas beneficioso pa cu otro factornan manera vivienda y cuminda. Tambe mester pensa riba e situacion cu hendenan ta bira malo mas lihe di, por ehempel, heimwee ora nan ta leu di nan famia. Ademas den e area di pagonan tambe e ta mas beneficioso pa traha cu forsa laboral local. De Meza a splica cu e ultimo añanan Valero a opera riba un 98% di forsa laboral local y tin hopi Arubano localmente, pero tambe tin un grupo bastante grandi cu a bay traha na paisnan manera Colombia, Suriname, Mexico y Qatar den e industria petrolero ora cu e refineria na Aruba a cera. Aruba conoce un forsa laboral hopi fuerte den e sector petrolero, y tur trahando den exterior sigur ta cla pa bolbe Aruba ora e "due diligence" di CITGO sali positivo y e compania dicidi di cumpra e refineria, el a añadi.

HAYA ARUBIANONAN BEK

De Meza a bisa cu e preocupacion cu CITGO a expresa ta “con lihe por haya e Arubanonan bolbe for di exterior pa traha na Aruba". Nan a laga sa cu na finalisacion di e negociacionnan, ora yega na un acuerdo, nan lo kier pa Arubianonan bin bek mas lihe posibel pa nan tuma nan na trabao.