De Meza: Citgo solido suficiente pa tuma refineria over

ORANJESTAD – E compania Citgo cu ken gobierno di Aruba firma e Memorandum of Understanding recientemente, ta solido suficiente pa tuma e refineria actual over. Asina minister di energia Mike de Meza a declara awe segun un comunicado difunti. Prome cu tuma e refineria over, si esey tuma lugar sinembargo, un periodo di trabao intensivo y complica di "due diligence" tin cu cuminsa, unda cu CITGO diferente representante lo bishita Aruba pa evaluacionnan tecnico y economico pa cu e refineria, y negociacion di e parti huridico y fiscal cu gobierno. E tres partidonan envolvi, esta Valero, CITGO y Gobierno di Aruba lo sigui den contacto estrecho.

CONTENIDO DI MOU

Den e MoU tin cierto consideracionnan cu ta wordo tuma pa cu varios decision relaciona na e "due diligence" cu e compania lo ta haciendo na Aruba. CITGO ta bin wak kico e refineria tecnicamente ta capas di dje y evalua economicamente kico e margennan riba mercado internacional ta pa cu e produccion, detayenan manera e tipo di crudo cu e refineria ta uza, e forma di operacion y e configuracion di e refineria tambe ta parti di nan evaluacion.

PROME PAFO DI MERCA

Pa CITGO, si e adquision di e refineria di Aruba tuma luga, lo ta e prome refineria pa nan p'afo di Merca. Segun e mandatario cu a firma e MoU, Mike de Meza "CITGO ta willing and able pa haci esey. Ta p'esey nan a "get engaged". Nan conoce nan mesun capacidad," De Meza a expresa referiendo na e inversion cuantioso cu ta necesario pa prepara y reactiva e refineria.

INVESTIGACION

"For di investigacionnan cu nos a haci tambe e ta un compania solido, e ta un compania fuerte, e ta un di e seis companianan mas grandi na Merca pa cu industria di petrolio. Pa complexidad y conversion for di zetanan pisa cu azufre, acido, nan ta number un na Merca," e mandatario a añadi. El a subraya cu nan ta pues "un compania cu tin hopi experiencia, experticio, profesionalismo y financieramente nan ta para solido".