Recherche di Reino cla cu rapport Mitch Henriquez otro luna

ORANJESTAD – Recherche di Reino (rijksrecherche) ta spera pa entrega e dossier investigativo den caso di Mitch Henriquez fin di october na ministerio publico di Den Haag. Asina e portal di e ministerio ta publica.

PROGRESO DI INVESTIGACION

Recherche di Reino mientrastanto ta bisa di a scucha decenas di testigo. Mientrastanto e agentenan sospechoso tambe a wordo scucha y a colecta imagen di video y a analisa esaki. E informacion cu a sali for di e investigacion tactico aki, ta wordo poni banda di e informacion cu a sali di e investigacion forensico, pa haya asina un plachi completo di kico exactamente a sosode riba e diasabra anochi cu a bira fatal pa e arubiano.

PROXIMO PASONAN PA TUMA

E investigacion ta casi asina lew cu e dossier pues por wordo manda pa ministerio publico. Siguientemente lo tuma lugar riba un fecha ainda no determina, un asina yama regiezitting, unda cu demas deseo pa investigacion lo bira conoci. Huez comisario lo determina despues kico mas lo mester wordo investiga. Finalmente, OM lo tin cu tuma e decision di un asina yama decision pa persecucion. No ta conoci ainda ki dia esaki lo ta.

MAS INVESTIGACION

Tabata casi na final di augustus ainda cu Noticia.Cla.com a raporta ainda cu Rijksrecherche tabata buscando un ‘testigo importante’ den e investigacion den morto di Mitch Henriquez. Asina e programa “Opsporing Verzocht’ a raporta na Hulanda na television hulandes e siman ey. E intencion tabata pa nan mustra e imagen di e testigo, cu ta visibel riba varios imagen cu testigonan ocular a saca ora cu Henriquez a keda deteni dia 27 di juni na e Zuiderpark na Den Haag. E persona cu ta wordo busca, lo no a wordo presenta den un forma reconocibel, segun vocero di ministerio publico di Den Haag, Wouter Bos. “pero esun cu sa di ken nos ta papiando, si lo reconoce su mes, basa riba e paña cu e tabatin bisti of e postura, of e lugar unda e tabata para” e vocero a sigui bisa.

E CASO MES

Henriquez fin di juni a haya su mes den un discusion cu polis riba e festival “Night at the park”. Ora cu nan a ‘apodera’ di dje, e no por a hala rosea mas y a bira ‘malo’. Un dia despues el a fayece. Mientrastanto tin 5 agente policial suspendi y ta marca como sospechoso den e caso aki. Cuater dia di disturbio a sigui na e sitio unda cu e incidente a tuma lugar, durante cual mas di 200 persona a keda deteni. NOTA: Foto ta di archivo di NoticiaCla.com di e marcha pa Mitch Henriquez ora cu su restonan a yega Aruba na juli. 

.