Impuesto di salida for di Maiquetia aumenta cu 900%

CARACAS – Biaha for di aeropuerto di Maiquetia na Venezuela ta bay bira hopi mas caro. Impuesto di salida for di aeropuerto di Maiquetia na Venezuela ta aumenta cu 900% otro luna. Pa medio di un comunicado, e asina yama Superintendencia di Administracion Tributaria di Estado Vargas (Satvar),a informa cu e ley di timpre fiscal a keda reforma recientemente (8 di september 2015), informando di e aumento di e impuesto di salida.

FECHA CU TA AUMENTA TARIFA

E comunicado ta informa cu entrante 1 di october proximo, e impuesto di salida pa biahenan pafo di Venezuela, lo aumenta te na 34 unidad tributaria (UT), esey ta nifica cu e impuesto lo bira awor 5.100 bolivar, pagabel ora cu cumpra e pasashi di biahe. E ta subi pues di 3.8 UT, te na 34 UN.

KEN NO TA AFECTA

Mes momento e ta informa cu esnan cu a cumpra e pasashi prome cu e fecha ey, no mester wordo cobra extra nobo. Pues e ta valido solamente pa esnan cu cumpra un pasashi despues di 1 di october.

AUMENTO ANNUAL

Mes momento e portal di e aeropuerto ta bisa cu e aumentonan normalmente ta tuma lugar na comienso di aña. E aña aki e aumento tabata dia 25 di februari ultimo, ora cu a aumenta e tarifa te na 570 bolivar, osea 3.8 UT.