TedEx Aruba 2015 ta ranca sali awe!

ORANJESTAD – Aruba ta cla pa su prome edicion di TEDx cu ta tuma luga diaranson anochi na Cas di Cultura. Den transcurso di diamars a yega tres mas di e total di 12 orador cu ta forma parti di e programa di TEDx. Ta trata di Jim Stoltze, kende ta e creador di TEDx na Hulanda y su funcion na e evento di Aruba ta di maestro di ceremonia. Tambe a yega e artista, tecnologo y filosofo Koert van Mesvoort, ademas di e Arubiano Varelie Croes, empresario tecnologico y Aruba su embahador den NASA, dr. Edward Cheung.Stoltze a yega cu hopi entusiasmo pa e dianan nos dilanti; e ta mira un potencial grandi den Aruba como sede di e presentacionnan aki cu ta un produccion independiente di e famoso TED Talks. “Mi ta kere cu e evento aki ta bay inspira mas hende na mundo pa tira un bista mas cerca riba e isla aki pasobra cosnan hopi interesante ta crece riba e isla aki; ideanan, productonan, comunidadnan, etc.” Stoltze a bisa.Na su opinion TEDx Aruba ta traha manera un megafoon pa conta e storia y ideanan Arubiano cu ta bale la pena comparti y asina mas hende na mundo ta bay namora cu e idea y hendenan di Aruba. Stoltze, mescos cu Koert van Mesvoort, tin un impresion masha positivo di e balor y potencial cu nos pais tin. E ultimo aki su presentacion ta enfoca riba e topiconan di naturaleza, tecnologia, economia y ecologia y con nan tur ta anda cu otro.“Nos ambiente tecnologico ta birando asina omnipresente cu ta imperativo pa nos sa con pa conecta economia cu ecologia,” asina van Mesvoort a bisa añadiendo cu “Aruba ta hopi rico den su moneda ecologico.” E orador di TEDx Aruba mañan anochi pa un grupo limita di 500 persona ta di opinion cu mundo mester desesperadamente di un divisa pa balor ambiental.Constantemente e ta pensa riba e manera con sernan humano ta interactua cu tecnologia y con esaki ta birando un naturaleza riba su mes; impredecible en berdad, pero tambe inminente. Tur hende riba mundo tin cu anda cu tecnologia y e ta algo cu nos mester bini hunto y papia riba dje.Varelie Croes, kende manera a menciona ta un Arubiano exitoso bibando na New York, tin un experticio grandi den yuda empresanan rond mundo, cu ta start ups, riba e tereno di tecnologia. Su participacion den TEDx Aruba 2015 ta bin, por bisa, pa aclamacion popular despues di su presentacion algun luna atras den TEDx Oranjestad Women.Durante su turno na palabra, Varelie ta bay papia riba e manera con pa nos haci miho uzo di e recursonan di tecnologia na fabor di humanidad. E ta invita tur hende pa bin cu un ‘mente habri, refleha riba loke e ta trece dilanti y pensa con pa implementa e consehonan pa crea productonan inovativo na Aruba.“Ta hopi great cu tin algo inovativo asina na Aruba. Semper bo por haya inspiracion di tende otro hende y vooral e TED Talks,” asina Croes a comenta. “Si bo ta bezig cu un proyecto of bo kier bira un empresario, bin tende kico por yuda bo cu bo idea.”Un di e ultimo TEDx Speakers cu a yega Aruba tabata dr. Eward Cheung, cu a splica cu ta bay trata e topico di sostenibilidad. Na NASA, e ta splica, tin hopi data relata na e cambionan cu nos planeta ta pasando door di dje y tin causa via di actividad di hende. Su discurso ta bay enfoca tambe riba loke mester haci pa e evita cu e cambionan aki sigui of afecta nos di un manera no desea.Pa mas informacion riba TEDx Aruba 2015 y con pa adkiri entrada, bishita www.tedxaruba.com of manda un email pa info@tedxaruba.com. E evento ta tuma luga na Cas di Cultura y ademas di e oradornan en bibo, ta conta tambe cu un Innovation Lab caminda empresanan local ta bay mustra nan producto y servicio.