METEO a extende e advertencia di calor te awe nochi

ORANJESTAD – E advertencia di calor cu tabata na vigor for di ayera mainta pa awe mainta, a keda extendi te awe nochi 10’or. Segun informacion di METEO, e temperatura halto riba diaranson ta banda di 35 grado Celsius na Aruba, cu humedad relativo banda di 70 porciento. Esaki lo trece un temperatura aparentemente banda di 38 grado celsius. Y mescos cu ayera, e temperatura maximo ta anticipa entre 1 pm y 3 pm.

ACCION DE PRECAUCION

Un advertencia di calor kiermen cu un temporada di temperaturanan halto y calor ta wordo anticipa. E combinacion di temperatura halto y humedad halto por causa un situacion cu malesa di calor por ta posibel. Ta pidi pa bebe suficiente liquido y keda si ta posibel den camber cu aire condiciona. Keda for di bista di solo si ta posibel y check riba miembro di famia y bisiñanan si ta necesario.

ULTIMO ADVERTENCIA

Segun METEO, esaki ta e ultimo advertencia pa awe diaranson september 23 2015 pasobra e biento ta aumenta, pues mañan diahuebs no tin advertencia mas.