Financiamento di Watty Vos Boulevard cla prome cuartal 2016

ORANJESTAD – Intencion di gobierno di Aruba ta pa e financiamento pa e proyecto Watty Vos Boulevard, ta completa den prome cuartal di otro aña, esta 2016. Den presencia di minister di Infrastructura y su conseheronan, e compania Mota Engil a duna un presentacion di loke ta bay bira e Watty Vos Boulevard. Un proyecto cu despues di a keda hinca pa casi 30 aña den lachi, awor ta birando un realidad bou di Gabinete Mike Eman II. Segun e mandatario encarga, hunto cu Green Corridor, esaki ta dos di e proyectonan di mas grandi cu Aruba lo conoce y cu ta bay cambia Aruba su infrastructura grandemente y den forma hopi positivo.

DETAYES LOGISTICO

E intencion di e proyecto ta pa mehora e conexion y calidad di espacionan publico di e areanan di Oranjestad y Eagle.

E tres partinan di e proyecto WVB ta: 1) Watty Vos Blvd; 2) Caya Ernesto Petronia; 3) Juancho Yrausquin Blvd & L.G. Smith Blvd.

Importancia di e proyecto aki ta cu e lo nifica cu Watty Vos Blvd ta conecta haf di Barcadera cu areanan di supermercado; aeropuerto cu hotelnan; y area di Oranjestad cu tur e partinan den bisindario.

Ademas lo crea mas cu 15 KM di ruta pa bicicleta; mas cu 17 KM di areanan pa cana y mas cu 1500 mata lo wordo planta. Tur esaki ta crea un ambiente hopi agradabel y bunita.

Den e Watty Vos Blvd lo bay tin 7 KM di camindanan 2x2; 5 KM di caminda 1x1 pa usuarionan di bicicleta y otro 10.3 KM di 1X2 tambe pa ciclistanan.

14 ROTONDE

Tambe e proyecto aki lo conoce diferente tipo di rotonde. Un total di 14 lo wordo construi pa conecta e diferente areanan cu otro y tanto na Meiveld como Hato lo tin un “overpass” .

FINANCIAMENTO

‘Mota Engil’ ta den e proceso di busca financiamento pa e proyecto aki, uzando e formula di PPP, mescos cu Green Corridor. Tin basta institucion cu a expresa interes y e desaroyadornan, cu ta trahando riba e diseñonan final, ta spera cu por ta cla cu e financiamento den e prome cuartal di 2016.

Manera ta conoci, na juli ultimo Gobierno a nombra Mota Engil como “preferred bidder” den e proyecto aki importante pa Aruba. Watty Vos Boulevard ta un proyecto importante paso e ta conecta cu tur otro proyecto andando