Firmanan colecta contra parkeermeter entrega na minister

ORANJESTAD - Cu un total di 1080 firma colecta,- cu segun e organisador Paul Gibbs ta un representacion di 80 % di esnan cu ta traha y tin negoshi den centro di ciudad. Segun Gibbs a splica NoticiaCla.com, pa bin un cambio, bo mester di firma di tur esnan envolvi. "Y esey e 1080 firmanan ya a haci". Ademas Gibbs ta mustra cu no ta cuestion di cuanto firma tin, sino di cua grupo. Ademas ta lubida, segun Gibbs, cu tabatin grupo di trahadonan di MetaCorp y Sociale Zaken cu tambe a protesta caba y cu tambe a firma como 'belanghebbende'.

MARCHA

E grupo di persona protestando contra e parkeermeter a marcha di cabamento di caya Gilberto F. Croes direccion bestuurskantoor. Algo despues di 7'or, nan a entrega e firmanan colecta serca minister di transporte Otmar Oduber, cu a ricibi esaki e momento ey. E meta di e grupo tabata colecta suficiente firma pa convence gobierno cu mester deshaci di e parkeermeternan recien introduci. No ta conoci cuanto firma mester pa por logra esaki.