Caso Carvajal tin similaridad na esun di Alvaro Triana

ORANJESTAD - E noticianan cu ta circulando for di diadomingo tempran caba di reunionnan importante di gobierno, menasa di bapornan di guera venezolano y tur relaciona cu caso Carvajal, ta casi similar na esun di Alvaro Triana. Esnan envolvi den tratamento di e caso, a recorda NoticiaCla cu e tambe, na mei di 1988, a wordo captura na Aruba riba peticion di Merca y despues extradita. Den caso di Carvajal, por sper ‘e e mesun situacion segun fuentenan a splica NoticiaCla, mirando su importancia y seguridad pa tanto su persona como trankilidad pa Aruba. Y si bay for di e punto di bista di e caso di Triana, aki dos siman mes, -mas tarda-, lo por spera extradicion di Carvajal pa Merca.

NoticiaCla e siman cu a pasa ta e unico cu a publica e cargonan oficial contra Carvajal, y nan ta implica cu e persona aki ta un ‘zware jongen’. Mescos cu Triana tabata e tempo ey. Suficientemente pisa, cu Venezuela ta purbando di tur forma pa presiona Hulanda pa laga Carvajal bay. Su detencion na Centro di Husticia a wordo cambia pa KIA, pero ni eynan e no tabata sigur. A dicidi pa cambi’e atrobe pa otro sitio. Y tur esaki tin di haber cu e posibel intento di gruponan militar venezolano cu lo ta preparando un entrada pa bay cu Carvajal, prome cu e wordo extradita.

Den caso di Triana, esnan envolvi den e caso a splica NoticiaCla cu for di momento di su detencion te na su extradicion, a dura ‘apenas’ 11 dia. Normalmente un proceso ta dura 60 dia y por extende mas. Pero den caso di Triana, esaki a dura masha poco. Y ora cu e extradicion a keda aproba, aunke e distancia di su cel na Huis van Bewaring e tempo ey na Dakota, tabata algun 100 meter di aeropuerto, e velocidad cu cual a transporte den un van, tabata halto. Tur esey ta mustra con importante y peligroso e personanan aki ta.

Tempo di Triana, a detene a peticion di Merca, riba base di cargonan di traficacion di droga. E la wordo aresta ariba 16 di Mei 1988, y a keda extradita dia 27 di mei di e mesun aña. Apenas 11 dia e la keda Aruba. Den caso di Triana ,su defensa no tabata basa riba su inmunidad, sino su identificacion ekiboca (mistaken identity). Pero mescos cu Carvajal, e ‘flie’ ey no a subi. Den un avion priva, despues di un session di apenas 2 ora dilanti 3 hues dilanti mesa berde, Triana e tempo ey a wordo transporta pa Fort Lauderdale, Merca. Despues di deliberacion di algun ora, e huesnan a conseha e gobernador di e tempo ey, Felipe Tromp efm, cu tabatin suficiente prueba pa extradita Triana. Si esey ta e caso cu Carvajal, ainda tin cu mira. NOTA: E foto ta uno di Alvaro Triana (mei mei) despues cu e la caba wordo sentencia y ta wordo hiba pa prison y despues pa extradicion na 1988. Foto cortesia ANP Historisch Archief Community